TECMO由旗下王牌Game引伸出嚟嘅《DOA沙灘排球》，終於喺上星期四（1月23日）見街。呢隻以絕色美女打排球為主嘅《DOA沙灘排球》，可謂XBOX機主日夜期待嘅勁Game，加上發售日一拖再拖，引得機迷期待度燒得更熾熱，此舉可謂令SegaSport、EASport兩間運動Game龍頭始料不及。
記者：徐影龍
今次隻《DOA沙灘排球》一眾角色皆由同廠另一系列《DOA》引伸出嚟，以八名女角着上多姿多采嘅泳衣登場為賣點，加上製作小組NINJA出色嘅3D人物模型，令機迷十分期待。
遊戲背景為度假勝地ZackIsland，日間以打排球及收集物品為主，夜晚則可到賭場大玩輪盤、21點、老虎機等玩意，目的係賺取大量金錢，以作購買售價昂貴嘅泳衣之用。遊戲最出色地方係大部份物件，都可跟女角有互動關係，除換泳衣外，重可穿戴頭飾、護腕、布鞋等，另外重有蛋糕、果汁等提供，打波打到攰都可補充一下體力，最抵死係曬得太陽多會令膚色慢慢變黑，必須定時購買太陽油及戴帽先可避免變成「黑珍珠」。
基本上泳衣布料愈少，賣價就愈貴，每個女角都有其特定泳衣收集種類範圍，不過當中較為開放嘅Lisa，竟有一件着咗等於冇着嘅寶石泳衣「維納斯」登場，叫價一百萬大元，行蹤飄忽地出現喺泳衣舖，屬有錢都未必買到之物，極為罕有。筆者獲得呢件終極泳衣後以為告一段落，誰不知網上流傳有方法令八位女角都肯着維納斯，可惜過程複雜兼靠彩數，主要都係大力催谷某人嘅友好度，適當時候就送呢件泳衣畀佢，最後肯唔肯着就要睇運數，網上就有機迷表示連送五次都被對方丟落垃圾筒，白白浪費辛苦兩日儲番嚟嘅五百萬，真陰公！
要跟人比賽沙灘排球，必須另搵一人組隊先得，不過除起初自願入隊嘅Lisa外，其餘人物都要先慢慢建立良好關係，才可拉攏入隊。良好關係好現實地需要物質支持，主要係定時奉送合適禮物，待對方頭上出現音樂符號時，即代表有好感，當中可憑音樂符號多少而獲知好感度嘅等級（等級為一至三）。
遊戲時間定為兩個星期，玩家可於指定時間內盡量收集心頭好，儲存於Collection內，在酒店內隨時欣賞。官方公布遊戲內泳衣款式超過三百件，計埋紀念品、食物同其他特殊道具，玩一次肯定儲唔晒，幸好可開啟爆機存檔重玩一次，務求儲齊所有物品為止。
1.不斷重點送出對方心頭好或喜愛顏色之物以增加友好度，價錢反而屬其次。
2.各人喜好之物件除可於說明書及揀人畫面睇到外，其實賭場上嗰八部老虎機都有暗示。
3.輸波會減友好度，戰略上應首周打排球，跟住七日就玩跳板，避過後期較難應付之對手。
4.將按掣由Analog轉為Digital，避免力度所引致之失誤。
5.比賽時盡量安排自己於網前位置，方便封網、殺球及托球，遇着對方封網，應按Recive掣將球挑過對方身後。
6.謹記小賭可怡情，豪賭絕對唔係搵錢捷徑，幾十萬隨時一夜清袋。
由於首批限定版《DOA沙灘排球》包含寫真集、海報及啤牌三款精品，令賣價一再炒高，最巔峯時曾炒到上$750，比日本定價7,800日圓（約港幣$540）足足多二百幾蚊，不過限定版精美兼大堆頭，照樣有價有市，現時市價約$650。據Game界中人透露，日本目前同樣價錢，不過淨跟其中一款精品，令到齊料版貨源更為渴市。不過好多機迷寧願忍手等只售$299嘅行貨版本，始終價錢相差太遠，行貨約於農曆年前後到貨。
一再期待《DOA沙灘排球》，除咗靚人靚景夠晒賞心悅目外，最主要係設有多款迷你遊戲及收集物件玩法，不過當爆機兩、三次後，漸漸發覺「主菜」打排球失去剌激性，反而被100%收集物件目標所吸引。總括嚟講屬一隻真正消閒嘅Game，適合閒時攞出嚟儲物件。可惜到截稿前仍未搞清跟《DOA3》有咩連動關係，歸納香港官方消息及網上傳聞，若《DOA3》爆機後便可開啟該位角色之隱藏物件及劇情，實情如何仍未確定，不過筆者就較為期望可開放島上其他未到過之地方，如Zack館、遊樂場摩天輪等地方，令遊戲變化較大。
遊戲類型：Sport＋AVG
對應機種：XBOX
遊玩人數：1至2人
音效：支援Dolby5.1
開發商：TEMCO
(C)TECMO,LTD.TeamNINJA2003