小初真係愈嚟愈唔鍾意布殊，本來細價股炒得好哋哋，但美國要打伊拉克，搞到成班炒家縮沙，噚日幾隻股仔出現斬倉疑雲，收尾先至證實唔係，有另外原因。
星虹控股（397）噚日勁跌36%，收1.6仙，成交股數有成23球，但金額就只得38萬元。
星虹早排公布，以1供9方式供股集資，供股價每股1仙，發行不超過40.3億股，集資4030萬元。上星期三係最後供股日期，今日會公布供股結果。經紀陳話，究竟有幾多人供股，相信大家心知肚明，星虹以1仙供股，以星虹急跌後的現價計，參與供股者仍然有錢賺，加上大批平價貨就快出籠，所以有人趁早沽貨係正常事，唔使大驚小怪。
另外，自上市以來股價一直企硬嘅永成化工（850），噚日突然大散，急跌34.5%，收0.36元，成交金額逾1千萬元。不過，經紀陳話收唔到有炒家唔掂嘅消息，可能係隻股炒咗一段時間，炒家散夠貨就收工之故。
慕容小初