《蘋果》讀者卧虎藏龍，八方上周提過三聯「歲晚墟」揮春義賣，書法家徐子雄諗到一句上聯：「百年一剎那魚翅撈飯好景如煙散」，下聯未有靈感。八方連日來收到好多位讀者傳真下聯，不乏應景之作。
其中黎先生嘅「九七千年紅鹹菜送粥悲慘處處來」，何君嘅「今後悠悠長慘過乞米怨氣向天衝」，重有pc嘅「五年轉眼間燒炭自殺悲劇到處生」，皆令人不忍卒讀，姑勿論平仄如何工整與否，都係有感而發之作。而未署名讀者就取態樂觀，話「十載彈指間鹹魚白菜逆境隨風去」，八方亦但願如此，捱埋未來五年，到時可能會有一番新氣象。
楊先生除對聯外，重寄來一春聯「經年驛馬形銷見行行骨立，歷冬嬴羊翹首望在在草青」，以送馬迎羊；八方雖非生意人，見行行骨立之句，亦只有唉一聲。
傳真︰2623-9278
電郵︰