獵頭M呢兩三年做到索氣，皆因啲銀行、證券公司因市場不景，firing多過hiring，獵頭M平時收CV（履歷表）就收唔切，收公司嘅招聘電話就近乎零，點搵食呀！於是發揮香港人轉型、增值、拼搏嘅本色，退出獵頭市場，去教夜校職訓班，推銷新軟件，算係掙扎求存。獵頭生意唔係冇，不過在連續四年不景氣之下，只有啲跨國巨無霸如SpencerStuartRussellReynolds之類先至可以企得穩。
呢日獵頭M帶埋個行李喼上嚟，重以為佢去上海㖭，原來唔係，佢打開個喼，裏面冚扮爛都係T恤，其中一件印上許志安、一件印上陳慧琳嘅靚相，非常清晰，係一流製作，佢哋啲fans一定鍾意。獵頭M話：「呢啲係最新日本獨家印製技術，相片包唔爛，唔褪色，與絲網打印完全唔同。你鍾意嘅話，可以同你做四件T恤，一家四口，一人一件，印上全家福照片、姓名。你哋公司搵一百人參加公益金百萬行，你可以訂做一百件T恤，每個職員一件（連姓名），印埋公司logo、年月日時、活動名稱……每件百零蚊啫，包埋T恤在內。」
咦，有啲噱頭噃，大公司搞周年職員陸運會，上千名職員各有一件個人T恤，又幾盞鬼。左丁山諗起如果將葉劉淑儀着紅衫戴黑超嗰張相印上去，A款加「支持廿三條」，B款加「反對廿三條」，可能幾好賣噃，唔知有冇版權問題呢？