響月初於美國底特律舉行嘅北美國際車展上，曾有多款新車展出，其中新版日產Maxima車系更備受車迷注目，而新車重有望於今年3月，響美國市場正式推出㖭！
新版日產Maxima將會以房跑車形象示人，造型屬流線型設計之餘，廠方更特別為3.5SE型號裝上18吋跑車合金胎軨，而3.5SL型號則配用17吋跑車合金胎軨，再加上設計獨特嘅鬼面罩襯托下，一派高性能跑車韻味油然而生。而車廂除空間寬敞闊落外，另外重備有承托力甚豐嘅座椅，以及設備齊全嘅中控台，可謂既實用又方便；另外廠方更為新車裝上全新Skyview天窗配搭，從而令車上乘客可有更多親近大自然嘅機會呢！
然而，廠方為新版Maxima配用一台，曾獲獎無數嘅VQ系列3.5公升V6DOHC引擎作動力核心，馬力輸出超過260匹不特止，就連扭力輸出數值亦超過34.6kgm，再輔以一套4前速自動波（3.5SL）或5前速自動波（3.5SE），性能表現可謂倍見出眾；另外重有多套電子系統如VDC及TCS等等，務求令新車能有更佳嘅循迹表現呢！