記得每臨農曆新年之前，老媽子總不忘在百忙中為我們添置新睡衣，實行去舊迎新過新年，到𠵱家大個女，買咩睡衣一於由自己話事，方發現原來睡衣款式可謂應有盡有，由嫵媚迷人的性感吊帶睡裙、俏皮可愛的Cutie卡通睡衣，以至充滿新年氣氛的中國斜襟繩結鈕睡衣統統齊備，靚到分分鐘可以着出街，今個年廿九着住做睡衣Show都得。
記者：尹珊珊
攝影：伍慶泉
ImageGirl：MayWong
無論是seethrough、繡花、喱士或令面絹質，只要剪裁成小小的一件吊帶裙，都能夠展示女性的誘人曲線，不過說到底，要着得起個人必備當然是一副有番咁上下的優美身材啦！
性感內褲$200（Triumph）
看的人心驚膽跳，着的人性感嫵媚，薄薄的一件大紅色花花吊帶睡裙，連同款內褲在內，全套均有seethrough效果，胸位繡有立體車花，令美好身材在若隱若現下表露無遺，最適合風情萬種的性感女士。
同屬危險性極高的性感吊帶睡裙，在低調沉實的棗紅色絹質布上，綴以手工精緻的繡花，質地輕柔軟熟，替肌膚帶來無比舒服的貼身享受，若然閣下擁有一身雪白肌膚的話，性感程度肯定更加爆燈。
睡裙$860(Triumph)
內褲$220(Triumph)
畢竟唔係人人都受得了大紅大紫，換上深藍色絹質透視吊帶睡裙，又會是另一番味道。雖然佢顏色較深沉，望落好似無咁性感，但其實睡袍底部繡有通花喱士，女人味十足，再加埋seethrough效果，絕對是騷在骨子裏的性感。
睡裙$830(Triumph)
內褲$250(Triumph)
老實說，吊帶睡裙的款式都較為千篇一律，難以有突破可言，呢件尖領的恤衫型吊帶睡裙，算是平凡中見不平凡，上身似足一件尖領恤衫，配上柔和輕巧的粉紅色絹布又不失溫婉俏麗，另有同料薄披及長褲可配搭成一套。
$500（LingeriePhilosophy）
在中國傳統風俗上，紅色代表鴻運當頭，紫色則代表催運，究竟着上呢件深紫色睡衣會唔會帶來好運，就真係不得而知，不過肯定唔會冷傷風，事關佢除了有性感的吊帶睡裙款，重有埋同款薄披及絹質長褲襯成一套，天氣轉冷都冇有怕。
睡衣連長褲$1,050(LingeriePhilosophy)
吊帶睡裙$800(LingeriePhilosophy)
話明係買新睡衣過新年，顏色方面自然以粉紅色、桃紅色、大紅色、深紫色等鮮色為主，咁先可以顯出新年喜氣洋洋的氣氛，如果再將斜襟和繩結鈕等傳統中國服設計引入睡衣內，今個新年定必有強烈的節日氣氛。
中國服飾都唔一定代表老套，好似呢套一式兩件的銀紫色絲光絹面睡衣，高貴典雅卻又唔俗氣，最過癮係衫鈕用上中國繩結鈕釦代替，着上身成個中國娃娃，襯晒新年的傳統氣氛，阿媽見到都讚好。
$140(LEONA)
唔少男孩子都鍾意將Tee恤波褲當睡衣着，不過話晒係過新年，點都要跟足傳統做法，買套新睡衣去舊迎新過羊年，好似呢套同樣充滿中國Feel的睡衣套裝，全棉質地吸汗又軟熟，比起着Tee恤更要舒適得多。
$144(LEONA)
勁似民初劇戲服的女童裝斜襟睡衣，特點是斜襟的領口位用上別致的繩結作鈕釦，衫身側邊另縫有嬌俏的蝴蝶鈕釦，方便穿着，布料方面選用印有金魚和風鈴圖案紅色花布，夠晒喜氣洋洋，又能盡顯小女孩活潑可愛的一面，尺碼適合3至14歲的小朋友穿着。
$112(LEONA)
既然女孩子有斜襟睡衣度新年，小男孩亦一樣唔執輸，有呢件參照功夫裝設計的藍色圖案睡衣同周公拜年，其布料以全棉製造，領口車工細緻唔易走樣，剪裁方面亦較為鬆身，穿上後活動自如，兼顧到小朋友平日蹦蹦跳跳的需要。
$112(LEONA)
無論六歲定六十歲，唔少女性都傾情於各路卡通人物，就算無特別喜好一個公仔，以下印有cutie動物圖案的卡通睡衣，一樣能夠討你歡心。
呢件棉質長睡袍繡有由多種布料裁成的立體小狗圖案，俏皮可愛，隱隱透出少女味，鬆身的剪裁更適合睡覺時穿着。
$140(LEONA)
厚身的棉質睡衣具保暖作用，上衣繡有兩隻大肥貓一齊玩躲貓貓的圖案，簡單得來又不失孩子氣，再襯上嬌嫩的粉紅色，試問女孩子又怎能抗拒。
$176(LEONA)
售賣點：
LEONA
地址：銅鑼灣恩平道48號恩平中心地下
電話：28081779
LingeriePhilosophy
地址：香港金鐘道93號金鐘廊1樓F5-6舖
電話：22940480
Triumph
地址：銅鑼灣羅素街50號德發大廈地下A舖
電話：27637668