老董剛剛連任半年左右，已經搞出唔少火頭，一陣又二十三條，一陣又話削開支，作為政府新聞官，今時今日真係唔易做。
八方聽聞早排新聞處內部開會，就提醒班新聞官喺處理新聞時唔好失咗先機，重搵咗個部門做「反面教材」，邊個部門咁「好彩」？咪運輸署囉！
話說早排搞落馬洲二十四小時通關，大批小巴、的士司機大佬話要入去接客，班議員重拉大隊入去睇，少不免就梗係「抦」吓政府啦；喺新聞處嘅內部會議入面就有高層唔係好客氣咁話，運輸署喺呢件事上失咗先機，俾班議員乘機「攞分」，跟住報紙就係咁寫，但係內容就唔正確，要到後來先可以澄清。佢重話署方新聞官解釋黃巴士運作，連佢聽咗都唔明，叫佢哋下次最好用圖畫表達，𠵱家新聞官真係惡做！
傳真︰2623-9278
電郵︰