美股上周五跌勢急劇，形勢好似有啲單邊跌市嘅味道，但港股噚日依然硬淨，恒指只跌161點，收9298。尾市期指更抽近全日高位，收9277，基本上係一個V形走勢。港股現時技術形態，由先前大落後變成較歐美主要股市「佳」，不過呢個「佳」字其實應該係「冇咁衰」咁解。
恒指噚日跟隨外圍美股跌穿去年10月升軌支持（現處9400），但低位9253仍較去年12月浪底9244高9點，在未跌穿9244之前仍唔可以話恒指轉為一浪低於一浪嘅走勢，好友守住呢個位其實可圈可點。不過，再睇番噚日歐洲股市則跌到七彩，滲出些少恐慌性拋售味道。特別係將會夥同美國打伊拉克嘅英國，富時100指數年初至今不夠1個月跌約11%，相當誇張，所以港股咁硬淨，趙飛雲都覺得有啲奇，會唔會只係大戶托住大市結算期指咁簡單？
倉內恒指Put輪9556有近30%升幅，短炒其實可以隨時獲利，但現時大形勢利淡，就算恒指出現反彈亦係彈散市，估計反彈受制於升軌阻力9400，不過升軌逐漸上移，較宜以噚日下跌裂口9416至9326作止賺位，如見補回全個裂口，9556宜先計數。此外，如果歐美股市噚晚跌得深，9556可趁今日低開先食胡，稍後換馬至恒指Put輪9587。
滙豐（005）噚日收83.50元，跌穿頭肩頂頸線85元，若短期反彈受制於85元，將反覆下試77.50元，睇一隻滙豐，大概可知後市去向，滙豐Put輪9588較理想上車時機，係正股回試85元頸線不破之時。
趙飛雲