港大何東堂噚晚舉行五十一周年高桌晚宴，請來陳方安生同《玻璃之城》嘅導演張婉婷兩位「大仙」做嘉賓，幾百個HTGirls着晒傳統綠色長袍出席。
陳太同班師妹憶述當年住宿舍嘅點滴，話自己未入住何東前，係乖乖女一名，從未有一日離開過屋企。佢又憶起當年喺陸佑堂同丈夫邂逅、共舞嘅情景。陳太對陳棣榮第一個印象係佢好高傲，佢當時已經有女朋友，兼且重當陳太係細路女。
張婉婷都有料爆，話當年同一個讀法律嘅女同學掛住玩，搞到人哋要留級，個同學𠵱家做緊高官，叫大家估吓佢係邊個。
最後陳太同幾百位宿生一齊，念咗尤利西斯其中一段詩，佢話自己做咗三十九年公務員，臨退休先至領悟其真諦，就係每個人嘅性格同命運都係由經驗同遭遇塑造嘅。
（圖）陳太話何東高桌晚宴唔經唔覺搞咗五十一年，提醒佢自己已經唔後生。黎樹雄攝
傳真︰2623-9278
電郵︰