八方噚日同衞生福利及食物局局長楊永強傾偈，話大年初一同佢拜年，局長就話佢嗰日已經約咗朋友去食飯兼打麻雀。原來楊局長都幾鍾意打牌，不過就唔係賭錢嗰種，佢重話自己細細個就已經識打麻雀㖭。
原來楊局長喺馬來西亞嘅時候，好細個已經學識點打馬來西亞麻雀，讀完中學等入大學嗰幾個月，佢因為冇嘢做好得閒，就時時都打，後來嚟咗香港，重學識打廣東牌㖭。
楊局長話馬來西亞麻雀同廣東麻雀差唔多，但就多咗啲花，不過馬來西亞牌玩法有少少唔同，就係如果出銃時，係由個做莊嘅賠錢，出銃嗰位唔使畀；不過到個莊贏時就可以收雙倍咁話。
至於其他賭技，局長亦識。好似鋤大弟咁，佢都話幾好玩，但就唔識玩「冚棉胎」。楊局長賭技咁精，話唔定佢年初一就可以喺麻雀枱上大殺三方，攞番個頭彩。不過唔知楊局長又會唔會按馬來西亞人傳統，撈吓魚片沙律食，寓意撈得風生水起咁話呢？
傳真︰2623-9278
電郵︰