演唱會阻住職足賽直播
步姐成球迷戰靶

唔知係咪日本天后濱崎步屬馬犯太歲嘅關係，繼先前佢唔願喺泰國公主面前行下跪之禮，犯咗泰國規條後，佢啱啱又整㷫日本嘅瘋狂球迷，睇嚟步姐都係要小心啲！
我大口羅拉啱啱睇咗日本報章《東京Sports》，份報紙話，日本WOWOW衞星台原定上個星期六嘅十一點十五分，現場直播效力德國漢堡足球隊嘅日本足球新星高原直泰，喺Bundesliga職足賽嘅首戰。由於先前電視台已經賣行廣告，好多球迷早就擔定櫈仔喺電視機面前等開賽。

電視台擺烏龍
不過等到播出時間，球迷竟然睇唔到球賽，反而係播出濱崎步舊年嘅演唱會實況同喺外國拍攝嘅片段，而球賽就由直播變成錄播賽事，兩個鐘頭後先至播出，搞到電視機前嘅球迷㷫過辣雞，不斷打電話到電視台抗議洩憤。其實今次擺明係電視台擺烏龍，先至令球迷有受騙感覺，步姐好唔好彩無端端成為球迷嘅戰靶。