一到農曆新年，總唔少得買啲年花擺喺屋企度布置一吓，袁詠儀（靚靚）同佢男友張智霖都唔例外，不過，一向喜歡講價嘅靚靚，就連買盆百幾二百蚊嘅水仙都唔放過講價機會。
馮仁昭聽聞佢哋兩個日前拍拖去維園行花市，想話買盆水仙放喺屋企，靚靚同其中一檔叫生生園嘅老闆講，叫佢幫手揀盆靚水仙，價錢幾平幾貴都得，但就一定要打番個折頭畀佢，擺明佢係有鋪講價癮啦！
除咗靚靚同張智霖之外，亦有唔少名人藝人鍾意親自去年宵花檔度揀年花，好似利孝和夫人、陳秀雯、蔡一智同蔡一傑兩兄弟、區海倫以及黃夏蕙等等，聽講利孝和夫人同陳秀雯喺花檔度揀咗啲百幾二百蚊盆嘅蘭花，夏蕙姨、區海倫同蔡一智佢哋就買咗水仙。
另外，馮仁昭知道拉姑狄波拉近排喺新界買咗好多盆大桔，自己擺喺屋企之餘，重送畀朋友，認真有心。不過，佢個仔謝霆鋒出道以嚟咁多緋聞，睇怕拉姑都唔使幫佢個仔買桃花擺喺屋企啦啩！
萬綺雯噚日喺九龍塘拍攝亞視新劇《萬家燈火》，佢一向都有長腿姐姐美譽，喺噚日天氣轉涼之下，重要着住條超短裙拍劇，所以一唔使埋位時，萬綺雯就即刻用件羽絨褸遮住對腳保暖，萬綺雯話今個農曆新年只係得一日假期，但係佢話自己住喺元朗咁遠，怕且都唔會有人去佢屋企拜年。
二人男子組合Shine噚日去商台做訪問，又南嘅嫲嫲喺近日因癌病逝世，又南話：「我去醫院探咗佢一日，第二日佢就唔喺度，重要係天佑話畀我聽。」原來又南嘅媽咪同天佑嘅媽咪都認識，所以佢哋一早就通咗電話，又南喺佢嫲嫲去世嗰日，重同天佑講過話唔去探病，而天佑話畀佢聽佢嫲嫲唔喺度時，佢成個人呆咗。
劉德華𠵱家已經正式放年假，佢噚日接受商台節目訪問，問到佢新年會去邊？華仔就話新年會留喺香港，問佢係咪可以陪女友？華仔話：「呢啲時間梗係留番畀自己，鍾意陪就陪，唔鍾意陪就唔陪。」言語間華仔默認自己有女朋友，但佢又再一次強調：「我冇結婚，亦都冇仔女，我都唔知點解成日話我結咗婚同有女。」
余文樂噚日接受港台節目《娛樂滿天星》訪問，對於有周刊搵佢八十歲嘅婆婆做訪問，佢話好唔開心，因為佢婆婆好隨和，擔心有不法之徒冒充記者入屋，搞到佢成日提心吊膽，重話傳媒唔應該騷擾佢屋企人。而對早前有太多不利傳聞，佢亦曾經心灰意冷，但佢話好多謝前輩譚詠麟、李克勤、黃秋生嘅鼓勵喎！
