記得細細個時，每日放學必定要睇完我最愛的《忍者小靈精》卡通，先至肯做功課，雖然當時唔知忍者係乜，只覺得小靈精用布遮住自己就可以隱形嘅隱身術好正。呢種對忍者崇拜的感覺正被淡忘之際，喺深圳居然見到間新開業的日本料理餐廳以忍者做主題，由裝修、菜式都帶點忍者的影子，自認哈日族的我當然唔執輸，一於試試呢度嘅新派日菜。
記者：歐嘉荃 攝影：林監琛
三大好玩菜式
最受歡迎的食物便是日賣100碗的相撲手巨人湯拉麵，16吋嘅超巨大湯碗從日本專程訂返嚟，內裏材料有2個拉麵、自家炮製的日式叉燒、兩隻蟹、日本魚片等，足足夠4個人食。我最欣賞係佢嘅九州豬骨湯底，用豬骨、雞骨熬足半日，入口味鮮帶濃，嗒落唔覺有味精，飲晒成碗湯都唔口渴。
相撲手拉麵賣相夠氣勢，連端上客人面前都甚有睇頭，兩位侍應用木托盤將拉麵抬出，重要邊行邊唱日文歌，真係好有特色！
呢個鹽焗蟹，食時要用鎚仔敲碎塊「鹽磚」。「蟹選用本地嘅大紅花蟹，蟹要實肉，每隻大約重斤半。」大廚Henry說。隻蟹的肉質果然唔錯，食落口一梳一梳好有口感，蘸上特製的酸汁，的確好味。
食得又玩得嘅沙律，我都係第一次見。廚師將生菜絲、紫生菜絲、甘笋絲和車厘茄等材料放入樽內，冚埋個蓋不停咁搖，跟住再配埋洋葱、醋、豉油等特製嘅日本沙律汁，味道甜中帶酸。
忍者居
電話：(86)75582298990
地址：深圳市東門新園路一號中海商城三樓
營業時間：11:00am-12:00midnight
交通：於羅湖關口乘的士約?15
食客直擊
港客王小姐：「呢個星期嚟咗兩次，每次我都係食刺生，我最鍾意食三文魚，新鮮又鮮甜。價錢同香港差唔多，每次都係百幾蚊落樓。」
一點意見
店內以神秘的忍者作主題，餐廳布置以黑色為主調，但我略嫌忍者形象未夠突出，負責人Albert說：「遲些天花板會掛些忍者公仔，還專程由日本訂了兩套忍者衫，屆時將有服務員穿上忍者服，在餐廳內招呼顧客。」
其他好嘢
圓形嘅壽司很少見，呢款五色雷火彈壽司，入面加了葱及芝麻嘅三文魚碎，入口肥美鮮甜。壽司的外層分別包着清香的木魚絲、魚味香濃的魚茸粉、腥中帶甜的黑魚籽、甜甜哋嘅蟹籽，同埋紫菜絲，每件都各有特色。
呢個海鮮湯，用個極富日式風味的茶壺盛載，湯底以木魚熬製而成，再加上蝦、冬菇、魷魚、白果等配料原壺再蒸，海鮮的鮮甜味混合在清淡的魚湯中。
大廚將銀鱈魚片捲着蝦、金菇等蒸熟，配上三文魚子、豉油及甜酒醬，銀鱈魚蘸上帶酒味的豉油，香濃軟滑，配合得恰到好處。
第一次到忍者居「踩場」，絕對可以感到這餐廳是港式管理的傑作，服務員的效率及處事的態度，較一般深圳餐廳快捷及得體。正在盤算是否港人開設時，我的同事希知便發現原來店內的總經理及大廚均是老相識，是香港金䱽日本料理的負責人Albert（左）和Henry（右）。問Albert為何會北上投資，答案依然係嗰句：「國內的發展空間較大」。
「國內人的處事同香港人唔同，為了令佢哋適應香港嘅工作模式，每個星期都會有三個小時的員工培訓，教佢哋服務的正確心態、銷售技巧等，每日重同佢哋開例會，雖然要花多啲時間作培訓，不過佢哋嘅學習態度比香港人認真。」Albert對國內員工十分讚賞。
余師傅高中畢業後便由家鄉四川來到深圳學廚，「我鍾意壽司夠千變萬化，初學時是跟日本師傅，記得第一次是整三文魚壽司，外表真係……唔係太靚。」余師傅尷尬地說。5年後的今日，余師傅已經成為壽司部的高級廚師，招牌壽司係五色雷火彈。