港股由月中高位9873跌至昨日低位9253，累積跌幅達620點，相當超賣，惟外圍仍未穩定，歐洲主要股市早段普遍下挫逾3%。美股若持續下滑，淡友今日必然借勢力壓港股平倉，今日市況將相當慘烈，好友可能會任由宰割，在美伊隨時開戰的情況下，有誰敢持重貨過羊年或入市撈底。
雖有傳聞地產基金快可上市集資，兼且會在樓市內掃貨，但本港樓市始終供過於求，市民置業意欲薄弱，樓價短期好難翻身，不過郭氏三兄弟繼續在44元水平入市增持新地（016）。黑客話，郭氏三兄弟對新地有情意結，增持唔一定代表看好後市。噚日摩根大通調降新地投資評級，由「中性」降至「減持」。新地面對的風險是售樓收益減少，投資物業租金受壓，而電訊、基建及酒店業務又微不足道。
聯通（762）及電盈（008）齊齊下跌超過3%，和黃（013）亦跌逾2%，偏偏中電信（728）企穩。據聞中電信快將向母公司收購5省固網電訊業務，當然同時又會開動抽水機抽水，投資銀行又點會輕易俾股價跌落去，點都頂住先，加上中電信唔係成份股，沽壓點都輕啲。
永成化工（850）噚日傳出有炒家被證券行要求在春節前搬倉，結果大跌34.5%，成交高達1007萬元。Cookie話，早前此股有大戶在0.60元水平頂到實，但上周三跌破此關，證券行驚出事，即刻迫倉，費事年尾流流中招。佢重話，由於證券行都驚打仗，相信可能重有二三線股被迫倉引致股價大跌。
光大科技（256）傳聞獲國內富豪韓國龍借殼，將冠城集團業務分拆上市。光科傳賣殼傳咗好耐，但光大集團主要想賣出光科套現，唔想再持股，若對方只想向光科注入資產換取控股權，唔係畀現金，相信光大集團未必同意。
阿虎