𠵱家通街都新貨，要突圍而出，真係要諗啲出位嘅招數。好似電盈咁，每個禮拜定期介紹數碼港貝沙灣嘅富豪會所，重次次有驚喜，以保持一定曝光率。
今日終於講到會所嘅最後兩個環節嘞，既然係壓軸兩招，應該幾有睇頭。發展商就透露，將會有一項隨樓附送，兼香港現時重未有得賣嘅高科技產品，究竟係乜東東，今日自有分曉。
電盈基建主席李智康每次出席呢類推介活動，身邊一定唔少得一班靚女，除此之外，今日重有意外驚喜，就係搵嚟人氣男歌手蕭正楠獻唱，重有一班小朋友表演，來頭都唔弱。況且，蕭正楠係電盈旗下嘅MusicNation唱片公司歌手，當然要幫吓自己友啦。
講開又講，近排唔少發展商搵歌星助陣宣傳樓盤，長實早排請女歌手容祖兒宣傳泓景臺，早年就用黎明推銷嘉湖山莊，市場都好受落，莫非呢招真係萬試萬靈？
中原地產上個禮拜喺會展搞周年餐舞會，經過一年辛苦，代理心情興奮，玩得都好盡情。當晚重有「靚女」表演辣身舞，令在場人士大開眼界。
原來個「靚女」就係新界區董事王浩聰（Chris），喺佢傾情演出，落力表演下，全場拍爛手掌。
Chris（圖二）當晚身穿冶豔女裝，令全場嘩然，舞姿一啲都唔失禮，直情拍得住職業舞蹈員。佢嘅打扮重維肖維妙，呃到唔少人㖭，蘭西有同事都以為佢真係女人嚟㗎。
Chris雖然身為新界西區阿頭，但都咁搏命演出，充份反映代理嘅拼搏精神。
房委會近年積極將公屋管理合約外判，為物業管理公司提供唔少商機，新昌地產最近就攞咗四份房委會第七期外判公屋管理合約，夾埋有十個屋邨31103伙，合約價值超過三億元。
新昌地產管理公司董事總經理樊卓雄話，得到份合約後，要請多一千名員工，其中保安同清潔各佔三百五十名，管業處員工就要三百位。喺今時今日人浮於事嘅環境下，物業管理公司有成千個空缺，對打工仔嚟講係好消息。聽講招聘行動已展開，薪金方面新昌就未有透露。
樊卓雄講，喺管業處嘅名額中，有二百零個會招聘房屋署職員，重有一套「人才再造培訓計劃」，幫佢哋適應公司企業文化。
九龍城校網靚係人都知，所以就算樓價企得硬啲，都吸引到唔少有錢人購買。好似成龍居咁，日前就有一個蘭西豆丁時已經聽佢做節目嘅女DJ，以二百四十幾萬買咗中層E室，面積674呎。
搞掂單成交嘅美聯，基於私隱理由，打死都唔肯講買家係邊個，淨係話佢睇咗十幾個樓盤後，先決定買成龍居。蘭西當然鍥而不捨，經過多方打聽，先至索到佢個姓同季節有關，八○年初好出名。
另外，中原代理嘅恒基深水埗嘉裕居，過去周末賣咗三個，其中一名買家係尼泊爾籍人士，原來佢一直都好想買啲一百萬上下嘅樓，今次係睇報紙，見嘉裕居有六萬八元利是𢭃，加上又滿意個單位，就用119萬買入中層A室，482方呎單位。
時勢唔好，搵食艱難，代理要出盡法寶推銷，賺取佣金，由於豪宅涉及嘅佣金都幾和味，有啲經紀聽到行家做成生意，竟然眼紅用卑鄙手段去破壞。
中原沙田豪宅分行經理李冠超向蘭西大吐苦水，話公司做咗單大埔滌濤山成交，有行家竟向買家爆陰招，話物業附近係猛鬼橋，好唔吉利，嚇到佢要去搵發展商查個究竟，後嚟至知原來佢唔係第一個遇到呢種情況，最後亦肯完成交易。
蘭西覺得，代理呢啲行為似乎缺德啲，第日自己遇到又點呢？
蘭西
電郵地址：
