噚日同大家講過，香港幾間電子傳媒爭相派記者趕赴巴格達，噚晚八方去立法會金融服務界議員胡經昌一年一度嘅蛇宴，醒起胡氏先翁、已故「金王」胡漢輝，未繼承家族金號前，做過中國最早期嘅戰地記者，抗戰時期寫過唔少抗日文章同新聞採訪。
胡經昌話，阿爸後生時喺廣州讀新聞系，不過平時好少同仔女追憶當年勇，佢都係睇返報道先知阿爸曾經咁威，連呢個傳媒蛇宴，都係胡漢輝留低嘅傳統。舊年胡經昌喺席上玩遊戲時送出第一桶「金」，原來竟係「柑」桔個「柑」。八方於是問胡經昌今年會唔會送真金？「金王之子」即刻答話：「𠵱家金價起喎！」
噚晚胡經昌不時發洩對政府取消最低佣金制嘅不滿，好似喺玩一個「騎牛搵馬」嘅遊戲時，就叫人搵同馬有關嘅啤牌，點知搵出嚟嘅竟然係馬時亨嘅玉照；重有「打馬頭」遊戲玩㖭。胡經昌重加多句話：「我乜嘢聲都聽到，唔會聽唔到噓聲。」擺明寸馬局長早前喺經紀大遊行時拒收請願信而被噓，後尾重話聽唔到噓聲嗰單嘢。
傳真︰2623-9278
電郵︰