若果要駕駛私家車經皇崗口岸前往中國內地，其實過程唔係太難，駕駛者只須持有兩地駕駛執照，另外再為私家車申請中港兩地車牌就可以喇！但根據統計，現時香港擁有中港通行牌照嘅車輛超過一萬五千部，但由於不少香港人都希望獲得呢種牌照，以方便佢哋駕車前往廣東省或其他內地城市，故此申請個案眾多，弄致整個申請時間長達約半年之久。
現時廣東省政府已降低申請中港兩地車牌嘅條件，其中外商只需在非山區（城市），實際投資額達100萬美元以上（約港幣780萬），或響山區實際投資額達40萬美元以上（約港幣312萬）便可申請；另外，如果車主擔任廣東省地級市以上，或廣州、深圳市人大代表或政協委員嘅人士，亦可獲得中港牌照。除此之外，若在廣東省捐贈或興建慈善公益累積金額達1,000萬元人民幣或以上，亦可得到中港車牌。
據每星期都要利用皇崗口岸，穿梭中港兩地嘅車主Raymond表示，響申報中港兩地車牌時，可填報兩至三名司機嘅姓名；而掛有中港車牌嘅車輛於過關時，必須由呢啲登記司機駕駛。私家車喺日間過關需時約半小時，加上皇崗口岸設施較好，所以有好多私家車都由文錦渡改經皇崗前往深圳。