講開食團年飯，餸菜款式中國人最講意頭！一般常食嘅發財好市、年年有餘、橫財就手都必定入圍；不過最近由私房菜做到落地舖嘅「思家菜」，就非常創新地製作了兩味創新團年菜式，並將簡單烹調方法公諸同好，祝願大家「人人有工開 嘻嘻嘻」、「個個有金執 哈哈哈」！
記者：朱崇德 攝影：黃叔榮、朱崇德
「人人有工開 嘻嘻嘻」除咗係你同我，甚至係所有打工仔嘅願望；據思家菜大廚管麒麟表示，今次呢味創新團年菜式，分別以鴕鳥蛋、鹹鴨蛋同雞蛋代表咗香港上層、中產同低下三個階層，望大家新一年可以打破零「蛋」，個個好似裏面嘅滑蛋海鮮一樣，賺到盤滿鉢滿。
「個個有金執 哈哈哈」可以話係一個形神俱似的菜式；螺肉配蜆殼粉的炸包，主要取其形似，有如裂口大笑的嘴巴，至於用神方面，這個炸包外形亦甚似一個荷包，希望大家都好似佢一樣，永遠漲卜卜！不過最鬼馬都係加三隻白灼蝦，食埋偕音「蝦蝦蝦」（哈哈哈）！
梁思浩的私房菜館，最近已經由上樓舖，玩到落尖沙嘴嘅地舖，而今次嘅意頭菜，就係今年團年飯中畀大家開開眼界嘅見面菜（需預訂菜式）；唔講可能唔知，尖沙嘴地舖裝飾好別致，竟然將成棵願望樹融入室內裝修，食客玩得興起，重可以學傳統願望樹一樣，掟願望法帖上樹，非常搞鬼。
鴕鳥蛋半隻
鹹鴨蛋3隻
雞蛋1隻
鮮奶2湯匙
鹽1/2茶匙
糖1/2茶匙
三文魚、蝦米、鮮蝦、帶子各適量
好少人知道，原來加了鮮奶後的炒蛋，口感特別嫩滑；不過爐火控制亦好重要，先燒熱油鑊再收慢火炒，然後再用快手炒，可免蛋身炒得「太老」。
碎豬肉4両
螺肉3両
甘笋1両
馬蹄少許
雞蛋1隻
大蜆殼粉6個
鹽、糖、胡椒粉、麻油各少許
電話：28655998
地址：尖沙嘴棉登徑8號3及4舖
根據中國傳統習俗，過農曆年，阿媽總會自己製啲炸乜炸物過年食，好似酥角（油角）、煎堆同笑口棗等，但到我哋呢一代，要自己動手做，恐怕不易！
據旺角花園街有成20年歷史嘅「奇趣餅家」製餅師傅馮南表示，其實好多過年食品製法都大同小異，只是成份材料稍有不同；但家陣潮流多講究健康飲食之道，所以好多時會將傳統嘅豬油搓麵粉，改由植物油代替；不過口感當然唔及前者鬆化！就以最簡單的笑口棗為例，最重要係材料控制得宜，成份比例是一斤麵粉配一両豬油，然後再勺量加入糖、水、蛋等配料，搓成粉糰，再切細包住芝麻炸，即成！
電話：23941727
地址：旺角花園街135號地下（近旺角道）
好多人食團年飯都知到例必要有雞！但點解一定食雞？後生一輩可能未必知道！根據中國人嘅傳統習俗，喺一年最後嘅一日（年三十、不過今年只得年廿九），通常都會一家人團聚兼祭祖，而一講到拜神，又點可以唔見雞呢！所以雞就成為飯枱上必備嘅菜式。
講到食雞，相信好易令人聯想到香港自家品牌──華香雞，佢哋擁有自己農場，走地雞加有機蔬菜，想今個年夜飯食得健康啲，呢度都算係不二之選；佢哋今年特別預備咗一個華香雞賀年套餐，菜式包括有招牌華香雞半隻、鴻運燴斑塊、發財蠔豉豬手、鮮菇扒時蔬、火腿雞絲燉翅（兩盅），足四位用份量都係$298，以𠵱家經濟市道，的確係有雞有翅咁豪得嚟，又唔算太貴，最好係佢周圍都有分店，唔使特登走去老遠食嗰一餐！
電話：24135892
地址：荃灣兆和街8號地下