讀者曾追問阿桂姐（岑寶桂）嘅羊年預測，左丁山於是搵到桂姐問，桂姐傳來一則傳真，佢哋嗰本《玄來問阿桂》之〈二○○三年國際流年走勢〉出版，內有卜卦講各地大勢，供各界參考。
本書為香港開卜四支卦（金融、地產、民生、地運），又為董特首、財神爺、葉劉氏問流年，結果係點呢？
金融：非常波動，無明顯走勢。
地產：樓市繼續低迷，未見好轉。
民生：依然困苦，政府幫不了忙。
地運：全年天氣霞霧偏多，少雨，空氣不佳。
董特首：健康平安大吉，冇主導政策。
財神爺：壓力更重，宜多注重身體，多多保重。
葉劉：官運亨通，流年運氣不俗，平安大吉。
咁講法，即係大家要捱，與左丁山前幾日所講嘅《羊年要捱》差唔多。至於中國呢，研易學會傅會長話中國形勢大好，阿桂就話中國經濟勢如破竹，聲望日隆，財富大增。台灣略見起色，日本大運不俗，復甦緩慢；美國負面因素多，經濟洩氣。
綜合上述，中國風景獨好，中國好，香港不好，我哋實行變成窮親戚，俾內地人睇唔起，遲早廣東省啲鄉長都會鬧張寶華：「不要插話」。
今年所有玄學高人都話香港在羊年冇起色，要等二○○四年，八運開始之年，大家應該宜守不宜攻，不變應萬變，保存實力為上。