Teresa除咗為大家提供咗一啲揀選車款嘅心得外，而且重提供咗唔少響國內駕車時嘅心得，同大家分享一下㖭！
國內一啲較偏僻嘅山區可能會有土匪出現，佢哋多數會響公路上放置既尖且硬嘅物件，令路過嘅車輛爆胎後繼而進行搶劫；如果安裝咗附有防爆設計嘅輪胎的話，便可響爆胎後以時速約60km/h行走多100公里路程，以擺脫賊人。
因為部份國內道路仍未設有街燈或燈光較為昏暗，故此選用一啲較光嘅高聚焦射燈（如7000W）會較佳，從而為你提供足夠照明。
如果響車上安裝適當及優質嘅影音設備，可令乘客更容易打發時間，亦可紓緩緊張情緒。
當長途行車時，車上乘客可能會感到疲倦；故此響某些高級型號上可配上按摩椅，以求令乘坐舒適度得以提升。
大雨行車時要避免駛過水坑，因煞車碟響高溫工作情況下突然用水冷卻，便會因冷縮熱脹而變形，大大影響制動表現。
利用七人車往返內地，以平均交通費計算，響滿載乘客嘅情況下，七人車嘅消費會比坐直通車或飛機平得多呢！
當需要於國內油站加油時，最好使用外國品牌及辛烷值較高嘅汽油，避免因汽油內嘅雜質損害引擎。
應盡量用中線行車，因路旁經常會積聚大量雜物，當汽車駛過時會將之濺起而令車輛「受傷」。