在娛樂圈浮沉八年，古仔知名度不斷增加，但他從不以紅星自居，他說：「以前我喺無綫做新人嗰陣，俾人揭發坐過監時，有部份人嘅面口好難頂，嗰陣你可體會到犯錯後要付出沉重代價。
「好彩公司同芭姐（無綫高層蕭笑鳴）對我好好，所以嗰陣我冇放棄自己，好畀心機拍劇，由每朝六點拍到凌晨四點，一句怨言都冇，公司啲人都叫我鐵人，𠵱家總算捱出頭。」
近月來古仔幾乎每晚都在家欣賞郭晉安主演的劇集《戇夫成龍》，對於安仔熬了十多個年頭才憑該劇吐氣揚眉，古仔覺得雖然是遲來的春天，但總好過春天從未來過。
古仔說：「安仔喺電視圈咁多年都係默默耕耘，就算𠵱家成功咗都唔會囂。我覺得佢嘅歷練就好似一個湖，年復年將湖水裝滿後，終於受用無窮，而我嘅歷練就重係一桶水，重要不斷加水，距離湖嘅境界重有好長日子。」