由於中國內地嘅路面環境與香港可謂截然兩樣，故此選擇適當車款來往中港兩地的話，絕對不能掉以輕心。有見及此，筆者特別走訪咗富利堡汽車中心嘅董事TeresaTang（左圖），睇吓佢對皇崗口岸24小時通關後，中港兩地用車嘅車款轉變，以及車主應選擇邊款車種穿梭中港兩地才係最適合。
「我哋相信當皇崗口岸24小時通關後，利用該口岸穿梭中港兩地嘅車輛數目，會大幅增加30%或以上，同時亦會令汽車銷售量有所增加，設備配搭亦會來得愈來愈豪華，同埋以舒適為先。」Teresa說。佢又補充，就車款而言，不少車主已由三年前所選用嘅中、小型私家車，轉變到選用高性能嘅四驅車或七人車，因為深港公路為汽車本身帶來頗嚴峻嘅考驗；有見及此，佢哋便於三年前開始由專人駕車往內地，以測試各種車款是否適合用作穿梭中港兩地，從而為客人提供既專業，又詳細嘅意見。以下就係Teresa提供畀中港車主嘅買車意見：
如果係自己駕駛的話，就一定要選擇馬力大嘅四驅車（如凌志LX470等等）；因為國內公路嘅交通情況較為混亂，好多時都會出現迎頭相撞嘅交通意外，而呢類型大馬力四驅車，不但性能表現卓越，兼且防撞能力又強，喺意外時亦能保障到乘客嘅安全。
若然車主本身係有司機的話，則可選擇高性能嘅七人車（如豐田Alphard、Estima，或日產Elgrand等等）；因現時嘅高性能七人車，除咗有大馬力同對車上乘客有周全保護外，乘坐舒適感亦都好高㗎。
Teresa又表示，由於預計中港用汽車銷量會上升約20%，故此富利堡汽車中心亦備有大規模嘅後勤支援服務，例如24小時緊急支援、拖車服務、國內對岸維修車輛中心等等；同時佢哋亦有一隊24小時支援隊伍，當收到車主求助時，會立刻趕到現場協助車主解決問題。而且佢哋為應付有關需要，更於去年11月，將零件倉嘅存貨量提升多200%㖭！