「最大嘅敵人就係自己」呢句說話，喺股市裏面非常啱用，就好似美國佬要打侯賽因咁，好多人都知道個市一定要先跌鋪勁，然後至有機會重現生機，不過伏勝叫人沽貨就冇人肯制。
講起叫人沽股票，伏勝就諗起上個禮拜行家甲叫啲客沽隻耀科（143），據個行家講，耀科之前一直被人睇好嘅原因，就係佢能夠成功打開大陸手機市場，當時唔少人唱好，話國內對老外製造嘅手機需求極大。不過時移世易，據說由於國內有好多唔同牌子嘅公司都生產手機，而且重幾好買㖭，結果搞到耀科嘅生意唔係太好，更有傳聞話間公司「責」咗唔少舊貨，分分鐘要進行撥備。伏勝覺得呢個傳聞未嘗無理，所以各位真係要提高警覺。
近排最Hit既人物除咗布殊之外，哈里波特嘅人氣都非常之高，而且重有第三集電影跟尾，相信呢個神話重可以繼續。有傳聞話隻玩具製造股僑雄國際（381）傾緊哈里波特角色造形嘅使用權，而且有好大機會傾得成。睇番過去十幾年，除咗盛極一時嘅忍者龜之外，都無邊一個人物角色可以暢銷全球咁耐，有行家就話一定要昅實呢隻股仔，因為分分鐘可能會成為當年彩星玩具（635）嘅翻版，到時真係收錢收到手軟。
睇番僑雄股價表現，早前由0.187元水平升上嚟之後，一直企喺兩毫字樓上，雖然成交量仍然唔係好夠，但睇牌路似乎重有後着，尤其係班買家好落力咁係兩毫附近吸貨。聽老友講，如果公司一有公布，股價要衝上2毫半相信唔會太難，重話各位如果有閒錢嘅話，不妨留意一下，話唔定有機會賺到啲利是錢過年。
伏勝