九人女子組合Cookies噚日喺鯉魚門廣場出席宣傳活動，同香港武術隊代表李暉碰面，九塊曲奇出場時重學人舞劍，但馮仁昭見到佢哋完全唔掂，只係識得棟篤企擺甫士，認真雞手鴨腳。
Cookies所屬嘅唱片公司EMI最近大執位，盛傳Cookies亦都大改組，九餅得番六塊，而成員Gloria、Angela同Helena將被飛出局。Angela噚日剛好二十歲生日，表演完畢後即刻有幾位男歌迷上台送禮物畀Angela，搞到佢鬼咁感動，返到後台重變咗喊包，要其他組員安慰佢。
Angela話：「唔擔心得咁多，我會接受公司嘅安排。至於生日願望，就係想留番喺Cookies！」
有傳隊長Stephy將會獨立發展，對於咁多傳聞，Stephy一於少理，佢話：「全部都唔係事實，我都冇話過會獨立發展，不過獨立係一個好機會，我都想有呢一日。」
薛家燕（好姨）由年頭忙到年尾，噚日佢去到沙田派福袋。
好姨話今年賺多咗，就算經濟唔好，派利是都唔會縮皮，佢話：「我今年都算好運，廣告雖然減咗酬金，但係今年都拍多咗，拍完廣告重有利是收，總括全年收入都係多咗，所以今年我唔會縮皮，大約預三萬蚊派利是。」
韓國女星金喜善一直都好緊張喺內地嘅發展，最近佢重泊到梁家輝呢個好碼頭，拍佢首套內地電視劇《情感季節》㖭。呢套劇將會喺南京、蘇州同黑龍江等地拍攝，內容講述一家服裝小企業，點樣發迹成為首屈一指嘅羽絨行業龍頭大哥。聽製作公司啲人講，梁家輝同金喜善原則上同意合作，成事嘅話，套劇年尾就有得睇。
陳煒噚日去旺角出席韓劇《情定大飯店》嘅宣傳活動。陳煒話：「我𠵱家做咗一間美容院嘅董事，所以要打扮吓，不過我唔想着三點式，所以就唔會做代言人。」
雖然陳煒噚日幫韓劇做宣傳，但佢就好倒米咁話：「我平時好少睇，都係睇吓經典劇集吸收吓演技。」
成龍噚日喺油麻地救世軍出席「送暖到內蒙」活動。
有報道話成龍會同張曼玉合拍新版《警察故事》，成龍話劇本已經寫好，但自己就冇時間拍，因為佢啲戲排到○六年，佢重好大口氣話推支票都推唔切。至於台灣名模李庭嚟香港搵唔到佢一事，成龍當然例牌話：「呢啲嘢唔講。」
