古天樂近年不斷與女星扯上關係，最近外間都認定他與鄭秀文（Sammi）在熱戀中，雖然古仔對Sammi評價很高，但他卻表示對方太事業型和女強人本色，非他杯裏茶。
三十二歲的古天樂出道八年來緋聞不絕，與他合作過的女星幾乎都跟他傳過緋聞，最近他與Sammi的戀聞更鬧得熱烘烘，雖然當事人照例否認，不過古仔對Sammi確實讚不絕口。
古仔說：「由電視劇《寵物情緣》合作到𠵱家，我覺得Sammi冇乜機心，工作態度幾好，記得喺成都拍《百年好合》時，佢哮喘病發作，但依然堅持上海拔幾千呎高山拍攝，同埋佢好驚哮喘病復發嘅消息俾記者寫出嚟，會令媽咪擔心，睇得出佢幾孝順。
「之不過佢唔係我杯中茶，佢畀人感覺太女強人同埋事業型，我自問係大男人，比較鍾意小鳥依人嘅女仔。」
古仔表明Sammi非杯中茶，那另外兩位女拍檔楊千嬅和張栢芝又如何呢？他說：「楊千嬅呢個大笑姑婆真係好鍾意笑，佢係好直嘅女仔，工作起嚟幾認真，記得早排我同佢去日本拍音樂特輯，喺零下十度天氣下拍一場喊戲，見佢話喊就喊，又諗唔到佢可以咁入戲喎。
「我同佢識咗咁耐都冇傳過緋聞，可能因為冇人會諗我哋兩個似情侶，事實上我同佢私下冇乜聯絡，連佢電話號碼都唔知，加上千嬅笑起上嚟分貝好高，我比較鍾意文靜嘅女仔，所以同佢呢類型幾難有得發展。」
至於張栢芝，她與古仔拍《我家有一隻河東獅》時，曾傳二人擦出愛火花，不過古仔說：「印象中栢芝做嘢不拘小節，同佢拍《絕世好B》時，每日佢都有唔少負面新聞，但我每次見佢做戲時都好投入，所以我覺得佢EQ都幾高。不過佢過份活躍嘅性格就唔係咁啱我啦！搬咗新屋後，我自己都好少去蒲，揀女朋友梗係想佢鍾意屋企生活。」
古仔續說：「之前我都識咗個圈外女仔，但佢真係蒲得太厲害，連我自己都頂唔順，當時我心諗都算報應囉，以前自己咁貪玩，到𠵱家想靜落嚟就撞着個咁類型嘅女仔，都可以話一物治一物。我承認以前比較放肆，但𠵱家我識女仔係諗住結婚生仔，唔似以前玩玩吓，天下間咁多靚女唔通我追得晒咩！」
