大家唔好一見到條標題，就以為平治C-Class推出無耐就咁快出出Facelifted版或轉款噃！其實筆者只係想話畀大家聽，平治預備響今年春季，為選購C-Class嘅用家提供兩個全新包圍套裝，從而令你嘅座駕睇落變得更富活力感咁啫！
喺廠方日前公布嘅新聞稿中指出，其中一套SportsPackage包括有17吋五幅式超輕合金胎軨連前輪225/45R17及後輪245/40R17輪胎，配合上經過跑車化調校嘅懸掛系統（車頭離地距調低25mm，而車尾則調低15mm），操控表現明顯較前變得敏銳直接；同時，廠方更會加裝刻有Mercedes-Benz字樣嘅制動卡鉗㖭！而排氣系統亦會作出改良，務求令駕駛者有恍如置身高性能跑車嘅感覺。另一套全新AMGSportsPackage亦包括有頭尾擾流器及17吋AMG超輕合金胎軨，望落同樣好有跑車Feel㗎！
車廂方面亦有些許變動，除前排座椅用上仿桶形設計，令你坐得更舒適外，而且重備有三幅式真皮跑車軚環、跑車腳踏及短波棍，一份高性能跑車韻味完全表露無遺。唔知香港代理方面，會否引入呢兩款咁吸引嘅SportsPackages抵港呢？