早前《蘋果》去採訪美國航空母艦星座號嘅兩名記者蔡元貴同凌樹輝，已經由六千六百公里外嘅中東返港返番工，八方噚日問佢哋有乜感動嘅經歷，佢哋話冇，「動感」嘅經歷就有。
原來佢哋係坐美軍運輸機C-2A灰狗（Greyhound）往返星座號，飛機喺母艦起飛，方法同大黃蜂戰機一樣，都係靠蒸氣彈射器彈出去。
阿貴話俾個巨型彈弓彈上半空真係唔講得笑，千鈞一髮之際，運輸機飛彈而出，佢面向機尾坐，已經俾條安全帶包到隻糭咁款，仍然成個人彈起，兩秒之後先彈返落座椅，刺激過海盜船十倍。起飛勁，降落一樣咁「動人肺腑」，當架運輸機準備着艦時，先掟一個靚急彎，再急劇下降，佢話成個人好似有度真氣由四肢走入丹田，難頂到想嘔。
不過咁，阿貴話諗番轉頭又覺得此行好抵玩，喺星座號逗留二十六小時，食足四餐，有空調彩電，重有個金髮女新聞官做嚮導，團費只收百五蚊港紙，重平過去迪士尼樂園。
傳真︰2623-9278
電郵︰