電影《哈利波特消失的密室》喺日本連續九個禮拜票房No.1，你都咪話唔犀利，唔少搞笑電視節目都食住條水，搵啲明星扮吓入面嘅主角。尊尼仔六人組合KAT-TUN最近都幫某本雜誌整咗個漫畫版《KAT-TUN‧Hotter消失的Pair》，造型同故事講真就同原裝唔係好似，但勝在夠騎呢！
漫畫入面KAT-TUN幾位成員分飾多角，其中最緊要嘅哈仔，就由龜梨和也扮演，講真佢就冇正牌哈仔嘅智慧眼光嘞，人又單薄咗啲，但比起上田龍也扮嘅肥版榮恩，同赤西仁扮嘅掃把頭妙麗，起碼都認得出嘅！至於其他角色方面，中丸雄一扮嘅鄧不利多校長，同埋山田淳之介扮嘅麥教授，就略嫌求其咗啲。而講到我羅拉嘅心水，就肯定係上田龍也分飾嘅管理員海格嘞，貪佢頭髮夠濃密似足大野人吖嘛！
《KAT-TUN‧Hotter消失的Pair》講哈仔、妙麗同榮恩合力搵出九個字嘅密碼，希望可以打開密室之門，但不斷俾人用哪渣招對付，過程都好淒慘㗎！