年貨年年辦，但忙這忙那仍是辦到一頭煙！尤其是海味乾貨，價錢矜貴，入錯次貨就最揼心！今日就攞個好意頭，同大家數9大必辦海味年貨，並請來黃又又如及其他海味老行尊，分享揀海味心得。
識食新貴黃又又如
香港早年著名建築商鄧鏡波的外孫女，倫敦大學法律系碩士，曾任職律師及投資顧問，並在報章撰寫文章。自幼受家族講究飲食的薰陶，識飲識食兼練得一手好廚藝。2年前更於中環開辦高檔雜貨舖。
眾多海味年貨中，今年以乾瑤柱最抵買，價錢普遍比去年平一成有多。又又如認為日本元貝最鮮味。買時以糖心色謂之靚，反而色澤很鮮、帶橙黃色的，往往沒那麼甜。另外聞落要鮮、不帶腥味。
購買髮菜時要特別注意成餅髮菜要夠蓬鬆。打過魚膠粉的假髮菜會過份有彈性，選購時不妨用手掹幾下。至於好的髮菜該帶一陣天然草味，聞落是清新的而非帶海水的腥怪味。
遼參煮時可發大約7倍之多，故一餐煮少少，非常襟食，且營養價值高。選購時留意刺針是否夠密和結實，色水亦要夠均勻。
日本蠔豉夠鮮味，但由於南韓跟日本的蠔豉樣貌極似，不少來自南韓的蠔豉都充作日本蠔豉出售！可留意南韓蠔豉顏色偏青，但說到底肉眼不易分辨，宜找有信譽的店舖購買。
花膠有公乸之分，乸的呈橫紋，摸上手厚度平均；公的紋理沒那麼並排，中間薄、側邊厚身，分別很大。而公膠絕對比乸膠優質，除質感較爽身外，煮時亦發得更厚。花膠中以白花膠最靚，現時以印度洋出產最有保證。
三代傳人潘權輝
早於1938年阿爺潘英福開始，便開了家福記海味。到了1972年，父親潘雄安接手便易名安記。一直到潘權輝，已是第3代掌舵人。家族經營海味有六十幾年，以鮑魚最聞名。曾獲香港服務業獎、又突破性的用自己的商號出罐頭鮑魚。
冬菇都是以日本菇最有質素，入口較香滑和爽。菇身呈冧形就是正貨，另菇的底部應呈淺黃色，若太深啡色則表示菇隻很舊，一定冇咁香，甚至會帶有酸味。最後不要揀菇「定」太粗或長的菇隻。
乾鮑要揀腰圓背厚，群邊夠粗、呈珠粒狀、摸落有點拮手，即營養夠豐富。色澤要帶些少粉狀，有糖心、夠乾身。聞落要有鮮鮑味。潘生話，以目前巿道，30-45頭的鮑魚最抵食。以日本鮑為例，30頭的約$4,300/斤。
至於方便易整的罐頭鮑，留意罐上標籤，「F」代表一級，「S」則為次級。
二十年經驗盧繼昌
54歲的盧繼昌，雖然只是名小夥計，但半生人都混在海味店，售賣海味有二十幾年經驗，可說是最知普羅客人心意的老行尊。
魚翅種類繁多，基本上以金山勾翅最靚。另翅身的不同部份，質素亦有差異。以尾勾翅最靚、脊翅次之、片翅再低一級。盧生話無論是哪個級數，揀翅時上手一定要乾身、色水呈金黃、產地就以澳洲較好。對消費者而言，最重要還是要睇剪得乾唔乾淨，若然重連埋啲魚肉同骨，就有呃秤之虞。
由最靚的官燕、毛燕、到草燕，很視乎客人捨得花幾多錢來吃。選購時一字記之曰：「密」。密度平均、帶陣「旱」味而非藥水味，就謂之好。現時印尼的產量最多，論質素則首推蘇門答臘。
店舖資料
（a）有食緣
地址：香港皇后大道中50-52號陸佑行地庫
電話：25236565
營業時間：星期一至六10:00am-7:00pm
星期日及公眾假期11:00am-6:00pm
（b）安記海味
地址：上環急庇利街8號金豐大廈地下G座及1樓
電話：25446336
營業時間：9:00am-7:00pm
（c）永利海味
地址：香港德輔道西96號
電話：25482408
營業時間：8:00am-6:00pm