證券經紀前日遊行反對取消最低佣金制，馬時亨接收請願信時被噓。噚日有記者問馬局長對被噓有乜嘢感受，其實馬局長應該有好多官式答案揀，可以話「Nocomment（不予置評）」，可以重申一次政府立場當答咗，再唔係感性啲，話自己都好明白經紀嘅感受、佢只係盡本份為香港工作等等。不過馬局長揀咗個最逃避現實嘅答法，話：「係咩？係咩？」記者答話：「（噓聲）好大聲喎！」馬局長於是話：「我聽唔到喎！」跟住急急腳走人。
之後馬局長一位新聞官補鑊，話馬時亨太專心接信，冇將噓聲放在心上。咁都得？唔怪得有記者行家講笑，話馬局長係咪向歌星Juno（麥浚龍）學習，有噓聲就借咗聾耳陳隻耳？
傳真︰2623-9278
電郵︰