佩魯賈前日喺意大利盃贈祖雲達斯雙蛋，歷史性躋身意大利盃四強。佩魯賈能夠創造歷史，唔單止因為班波當弗，最關鍵係佢哋高層醒目，由早幾日開始實施新聞封鎖，唔畀人煩住，幫到班球員同埋下盤客。
自從佢哋喺禮拜日砌低國際米蘭之後，有好多人重談論緊兩個問題入球，國際米蘭方面又不忙繼續炮轟已經認咗犯手球嘅維沙斯。佩魯賈方面一於闊佬懶理，而且無限期停止接受傳媒嘅訪問，等班球員可以專心比賽，真難為意大利班行家。
講時講，由祖記借去佩魯賈嘅米高利又省入一粒，兩回合對所屬球會入三球，踢咗祖記出局，睇嚟佢唔想回巢定嘞。
德甲聯今日開番，焦點當然集中喺新加盟慕尼黑1860嘅邵佳一身上。國內傳媒猛吹佢會喺作客羅斯托克嘅比賽登場，若然屬實，我求大俠都戥佢開心。之但係，邵佳一之前未替1860喺正式比賽上陣，未必有發揮，我求大俠擔心佢如果落場，或者只會愈幫愈忙。
我哋《蘋果》體育除咗要做到貼波夠準之外，重要令讀者睇得開心同舒服。就係因為咁，由今個禮拜六開始，我哋會將每場直播嘅賽績搬番落一版叫「勁爆賽績王」入面。咁樣做，最主要係為咗方便讀者刨賽績，唔使將份體育版揭嚟揭去。我哋《蘋果》體育一向非常開明，如果讀者有乜嘢意見，好歡迎透過電郵或者來信話畀我哋知。
愛爾蘭後衞夏迪效力列斯十年，冇功都有勞。不過自從領隊雲拿保斯上台後，夏迪明顯被離棄，日前佢終於忍唔住大吐苦水，以佢喺列斯隊內嘅江湖地位（成棚兄弟），今次咁講嘢隨時揭開反雲拿保斯浪潮。陣前傳出咁不利消息，唔知列斯今日對基寧咸會唔會有暗湧呢？
講開前日嘅比賽，我睇波友累積咗咁多盃賽經驗，一定知道賽前睇兩軍陣容嘅重要性。一睇祖記首回合落後緊仍然派副選上陣，就知佢哋唔志在；皇馬對馬略卡，落場嘅星級球員寥寥可數，呢啲波唔買下盤等幾時？咪話我賣花讚花香，呢兩場波我哋蘋果波經又中晒盤，青蛙仔連佩魯賈二比○都中埋，問你服未？
葉士域治今日將喺足總盃惡鬥錫菲聯，大戰當前突然傳出佢哋放走名氣最大嘅雷沙，由得佢自由轉會。不過我求大俠提醒大家，呢位仁兄今季只係踢過兩場波，重要極有限，咪俾呢段消息嚇親。我哋蘋果波神就一於少理，繼續瞄準推介葉士域治。
逢周六、日見報