無線、有線搶赴伊拉克採訪 - 李八方

  無線、有線搶赴伊拉克採訪 - 李八方

《蘋果》記者上咗美國母艦,本地三間電視台亦有行動,其中無綫同有線電視新聞部最勇,各自派出資深記者趕赴伊拉克首都巴格達。有線強調佢哋係第一隊到達伊拉克嘅香港電子傳媒,由助理總監馮德雄帶隊,三位男記者高劍青、吳曉東同蘇啟智911之後都到過阿富汗採訪。
無綫啱啱相反,派出兩位女將新聞經理謝彩雲同總採主譚衛兒,重話佢哋坐飛機都坐咗十五個鐘,好轉折先去到巴格達,譚衛兒更搶先用長途電話開咪,真係分秒必爭。不過聽講啲器材入境有阻滯,而且有官員陪同採訪,貼身服侍。
亞視數口重精,大股東劉長樂身兼鳳凰衛視主席,既然鳳凰衛視有記者去伊拉克,亞記一於「一雞兩味」,用埋鳳凰衛視條片,再加上電話訪問新華社駐巴格達記者,咁又搞掂。


傳真︰2623-9278
電郵︰[email protected]