周四美股雖然反彈，但尾市期指又大幅下挫，港股在連續「企硬」兩日後，昨日終告不支，又再跌過，市場預期美股周五跌勢會再起，恒指險守9400水平，最低9416，收市9460，大跌124點，成交77.9億元，沽壓都幾重，期指亦係由淡倉主導，收9412，大跌197點，由高水轉為低水48點。
同芬佬傾開，佢話短期市況只係牛皮偏軟之局，但唔會大跌，落到去年12月30日低位9245水平應有支持，可以重新來過。不過，若然恒指跌穿9400，則9245未必守得住，以跌破旗形的量度跌幅計，恒指最少會落到9100，對後市有信心者，可以到呢個位先買貨。
國企指數周四大跌18點後，噚日再跌兩點，中期調整經已開始。噚日指數小跌，主要係大成份股如中石油（857）和中石化（386）仍有小升，其他則少榮多辱，跌勢最急的如中海發展（1138），唔見8個位，跌幅4.2%。
今次國企升浪，主要由外資大行同基金買起，大陸資金反而未見有大動作。不過，聽講大陸資金除咗佢哋以前用開嘅中資經紀外，亦都有發盤畀外資大行做，所以，唔排除國企今個升浪，係中資同外資「齊心合力」造起者也。
基本上，外資大行嘅國企愛股，主要係華能國際（902）、兗州煤業（1171）、中石油同埋去年才全力收集嘅上海石化（338）。大陸資金嘅愛股就有幾隻鋼鐵股，其中尤以重慶鋼鐵（1053）係主力，另外重有哈爾濱動力（1133）、第一拖拉機（038）同埋幾隻公路股等。
國企指數由去年11月底的1900上升，到今年1月13日的高位2192，共上升292點，升幅15.3%，近期走勢似形成高低頂，頸線在2113，若跌穿，量度跌幅目標為2034，約莫在去年12月底的高位水平會有支持，可再入市。
揀邊隻股好？筆者仍屬意上海石化，若有機會在1.2元至1.25元上車，今年目標可見1.8元至2.0元，其次係重鋼同中石油，升幅估計亦會有3成。
郭兆誠