張栢芝自從同謝霆鋒分手之後，情緒起伏無常，唔係俾人見到佢去shopping時神不守舍，就係俾人見到佢同班朋友周圍wet，完全冇心工作，搞到好多人想搵佢做嘢都要諗諗。
不過，栢芝嘅名氣就幫佢細佬張豪龍造就咗好多工作機會，除咗拍電影之外，馮仁昭八到無綫最近都想簽張豪龍。
話說上星期有人喺無綫電視城停車場，發現栢芝部黑色Benz，一度以為栢芝入無綫傾嘢，點知冇幾耐就見佢細佬張豪龍揸走部車，先至知道原來無綫想搵嗰個係張豪龍。馮仁昭初時以為無綫想搵豪龍拍劇，但最後探子回報，無綫原來係想搵佢接替陳松伶、葉文輝（啤梨）同嘉碧儀做新嘅《勁歌金曲》主持，不過，無綫對張豪龍今次試鏡極度保密，因為始終重未決定係咪用佢。
徐若瑄（Vivian）喺日本嘅發展已經好似扎晒根咁穩陣，喺日本都可以話冇乜人唔識佢，咁自然拍廣告搵錢嘅機會都愈嚟愈多啦！最近Vivian代替咗日本九頭身女星吉川日奈，做咗PEACHJOHN內衣品牌嘅代言人，喺最新一輯嘅Catalogue入面，重親自示範內衣，大騷fans久違咗好耐嘅驕人身段，認真搏到盡。
蘭桂坊集團喺上年嘅十月二十七號，喺蘭桂坊搞咗個二手衫義賣活動，為無國界醫生做籌款，當日剪綵嘅嘉賓有盧巧音、宣萱、韓君婷同翁虹等等，而王菲、劉嘉玲同何超瓊等幾十個名人、明星，亦都攞咗好多衫出嚟義賣，結果攞咗成二百幾件衫嘅王菲，佢嘅衫賣到三萬幾蚊，係全場賣得最多錢嘅明星。日前蘭桂坊集團嘅主席盛智文，重將籌到合共二十萬嘅善款，舉行支票頒贈儀式，轉交畀無國界醫生嘅代表。
潘迪華噚日去新城接受薛家燕訪問，佢話喺新一代嘅歌手之中，最欣賞容祖兒（Joey）。潘迪華話：「第一次容祖兒同羅文唱歌我已經覺得佢好有潛質，聲底好，而男嘅就個個都要進步。」另外，潘迪華籌備喺三月舉行個人音樂會，到時重會請一班老朋友做嘉賓。
劉燁噚日由青島趕去深圳，為內地電視劇《拿什麼拯救你我的愛人》宣傳，佢喺劇入面演一個殺人犯，佢話因為劇本寫得太好，都唔使請教人都演得到。至於有傳佢同林嘉欣拍戲時擦出愛火花，佢話：「我都知道有呢個傳聞，大家都係好朋友。」
