Elaine同Bill剛買了架八人車，心想：「做咗有車階級，重使乜等到年廿九先去維園行年宵買年花！」一於趁今日年廿三，好有型咁揸車入西貢，沿清水灣道直入，已經有近十個花場，桃花、菊花、年桔、開運竹、水仙……樣樣都有，想買乜就買乜，爽呀！不過記得帶備現金，因為花場無得碌卡㗎！
記者：梁佩芬
攝影：陳陶鈞、黃子偉
模特兒：Elaine&Bill(KOne)
於清水灣道就嚟入大斜路時，右手邊就出現個大桔場，橙色的桔仔布滿整個小山丘，隨勢掟個靚彎直入買桔！
一入場，就見到不願出鏡的花場老細炘叔，說：「這裏有成20多萬呎，過萬盆桔，都算係全港最齊、最多及最大的桔場，大、中、細、加細形狀都有。」怕曬的Elaine一見陽光遍地，開始用手又用袋遮着雪白的臉蛋，突然間，看見幾個有蓋的朱砂桔場，當然第一時間躲進去。「嘩！」Bill大叫，內裏棵棵都高過佢（他有六呎高），個場又大，兩人興起無聊到玩捉迷藏！
炘叔正要叫佢哋唔好玩，Elaine卻說：「屋企得六百呎，點放咁大棵桔呀！」炘叔左手指指：「無問題，我哋有大、中、小及特小Size，以供選擇。」
有位種桔五十多年的炘叔在旁，梗要問：「點先係靚桔？」六字真言：「多桔、四正、葉青。」再問：「你哋幾點閂門？」炘叔笑說：「呢度係我屋企，二十四小時開放，年尾成日都有人半夜三、四點入嚟買桔！」
朱砂桔果實大、色澤鮮豔，栽種得宜，果實能保持九個月而不落，稱為年桔中的「貴族」，一棵最高能種至六呎，價錢也比其他桔稍貴兩成。
朱砂桔
$180-$3,800
近年新品種，是四季桔與金桔的混合種，所以外形與四季桔相似，但四季桔是扁圓形，龍膽果則係上窄下闊，似一個縮水沙田柚。而且，常吃龍膽果可刺激肌膚還原膠原蛋白，增加肌膚彈力及緊實肌膚，過年時小心親友隨手摘之。
龍膽果
$200-$2,000
取其四季吉祥的意思，外形金黃鮮豔，飽滿晶瑩，可惜是肉雖甜但帶酸，多與金桔一樣，年十五後就醃製成清潤之果。
四季桔
$650
年桔外形似柑般大，每年正月時分，肉最甜、多汁、皮薄、果最大，加上這款是由花場主人炘叔親自配種，全港獨有，味道不錯！
年桔
$480-$2,800
樂天花園（27190804）
地址：清水灣道井欄樹白石窩7DD253Lot1093
營業時間：24小時
Elaine覺得只買桔，稍嫌欠缺色彩，着男友再沿西貢找尋其他花場。不消一會，冧女有一手的Bill就在西貢公路大涌口找到數間花店。內有專賣水仙、盆栽桃花的佳記；賣開運竹的富屋及門口有稻草人歡迎你的水木橋。
下星期六就過年，Elaine想懶又鍾意水仙，李老闆就介紹這個九菖水仙頭給她，只要買回家放水浸過根部，到年初一就開花。精明的Elaine大叫：「這裏九菖頭都只售$30，比市區平幾十蚊。」
Bill趁女友忙着楝水仙頭，就乘機行近盆栽桃花，心想：「盆栽桃花細細哋，行多幾個圈都唔多覺！」老闆更教他：「買盆栽桃花，只要堅持每天灑水，隔星期施肥，就不怕花謝凋落，年年開花，明年還會繼續開，閒閒哋養足十年。」
佳記花園（27927440）
地址：西貢大涌口村大涌口路217約907地段
營業時間：上午8時至晚上6時
富屋以賣盆栽為主，為應節都有五代同堂及水仙，但就只得他有開運竹。靚女Elaine卻愛一盆有多色的蝴蝶花，花瓣如手掌般大，顏色有紅、黃、藍、紫及橙。
開運竹
六層$150
八層$280
富屋東記組合花園（27923389）
地址：西貢大涌口
營業時間：上午9時至晚上6時
買得七七八八，Bill突然醒起：「唔記得幫阿媽買菊花！」勿急，富屋隔籬的水木橋，就有大量菊花仔。
富貴菊 $40
水木橋花園
電話：27920073
地址：西貢大涌口村23號A
營業時間：上午9時至晚上6時
買完桔同花，就到開餐時間，Bill以前讀科大，知道喺大埔仔有間花卉食坊。Bill好欣賞食坊環境，既有撈魚場、迷你花圃、園林露天餐廳，還有熱辣辣的泰國菜，一坐低，就立即Order咗勁辣冬蔭功湯、紅咖喱椰心雞及泰式炸蝦餅。怕曬的Elaine就不像Bill般活躍，瑟縮於有蓋座位上，看着Bill與小孩玩樂，吹着微風唞唞氣。
花卉食坊（27199393）
地址：清水灣道大埔仔村（近科技大學）
豐田Previa可謂係車壇長青樹，新一代版本推出至今仍備受車迷追捧，皆因佢除咗擁有一個極富前衞感嘅造型外，靈活多變車廂布局、一應俱全嘅設備配搭，以及雙趟門組合亦為賣點之一。而一台2.4公升直4引擎既好力又寧靜，輔以豐田獨有嘅VVT-i技術，亦能帶來低耗油量嘅特性呢！
豐田Previa小檔案
引擎：2362cc直4DOHC
馬力：156ps/5600rpm
扭力：22.9kgm/4000rpm
尺碼：4750×1790×1765mm
軸距：2900mm
新車售價：
$285,000（七座位版）
$279,000（八座位版）
車輛提供：皇冠汽車（23678332）
駕駛路線
1.從彩虹入清水灣道，過井欄樹村後到白石窩，右邊便是樂天花園。
2.清水灣道沿九龍方向駛向科技大學，見大埔仔村大門，路旁有小路，沿左邊直駛入花卉食坊。
3.出清水灣道入西貢公路，過濠涌高爾夫球場後，約五分鐘到達大涌口。
泊車貼士：樂天花園及花卉食坊可免費泊車；大涌口有咪表位。