據香港代理官方發言表示，《DOA沙灘排球》原定2月18日全球同步推出，但竟然臨門有變，美、日版搶先喺前日（22號星期三）派貨，搞到香港代理要即時諗計留客，加碼送出四大精品畀預訂行貨嘅機迷。
由今日開始，到XBOX四大特約專門店預訂《DOA沙灘排球》，可即時攞走三大特製精品，包括A1Size大海報（約報紙攤開之尺寸）、紙製掛飾、立體揮春等，而正式派貨時，更可獲得第四款精品──印有三位女角之沙灘排球一個，四件精品全屬行貨獨有，賣價則維持不變為$299。要注意預訂同一般Game舖做法唔同，需要一次過畀晒$299，有心買嘅機迷記住帶夠錢喇。
經過發售日重重波折，代理都唔敢太確定行貨推出日期，總之最遲係2月18日，而且極有可能趕及農曆年廿九派貨，Fans唔使等到頸都長。當然機迷今次唔好抱太大期望，即管聽住先。不過話分兩頭，行貨賣$299兼送四件精品，差不多平水貨一半（水貨賣價接近$700），若果唔係太心急想玩，不妨忍吓手等行貨，話到尾日版套啤牌同Poster點計都唔值$300。
上星期《打機樂園》預告送出五十張立體揮春畀讀者，今日終於有貨喺手，大家只需喺今日12:30pm至2:00pm內，手持本版到銅鑼灣地帶227-228號舖「ProGamerShop」，就可免費攞走呢張抵死過癮嘅立體揮春，記住，手快有手慢冇！
百視達（深水埗西九龍中心）、玩具反斗城（九龍塘又一城商場）、ProGamerShop（銅鑼灣地帶）、A&AAudio&VideoShop（金鐘太古廣場）