近日喺青衣長康邨舉行咗個1:24Mini遙控賽車積分賽，吸引到玩具生產商、零售商，重有車迷動員老婆囡囡瞓身支持。走勢咁凌厲，難怪有老行尊預測1:24Mini遙控賽車將可打破一般遙控賽車，會興足十年甚至二十年咁話。唔想Out，唔玩都要睇睇喇！
記者：李玉蘭
攝影：傅新發
阿馮喜歡玩車，但更Enjoy一年搞10幾次遙控比賽，為了搞今次比賽，『通頂』一晚的他手拿新型號Mini得意展示，「細時自己無米兼車貴，玩遙控車只係得個恨字。𠵱家識搵錢，1:24遙控賽車仔只賣五百零，平過售二、三千到萬幾蚊嘅1:10遙控賽車；而且Size夠細，屋企走廊都可以玩；時速重可調校到60公里，OnScale計算，有成7、8百公里，要控制佢喺球場左穿右插，真係好似揸住飛機，同人『片機』咁刺激。」
自己玩上癮後，阿馮索性成立非牟利體育會，將熱愛公諸同好。女兒馮晴悄悄地說：「爸爸平時放工就會喺屋企做跑道設計圖，每次搞比賽都要通頂，昨晚瞓得幾十分鐘咋！所以我即使考試都會幫手，否則爸爸好辛苦！」在會場朝九忙到晚六的還包括馮太，對玩車毫無興趣的她說：「老公又不是迷上不正當活動，當然要支持。」
「改避震、車胎……可令車速去到幾百，但快唔代表完美，因摩打負荷不來，又或唔夠電力，反而影響落場表現！我會用一切方法改到Fit為止，講到尾，Mini係一個玩『手指技術』、考反應和集中力嘅比賽，能夠做出一架合自己Style、無視其他車仔嘅車，令人無比快感。」
凡遙控車迷都識得莫生莫太，因為兩夫婦除了近二十年逢賽車必到之外，大部份戰車都出自莫生的設計和生產，「以前為怕做錯嘢而陪客玩，後來供應商停產，他們把剩餘的零件送給我，我便由代理變做生產商，設計生產全球第一部四輪驅動的1:24車仔！而且以OnScale計，車仔可去到飛機時速，又可以有直路快放，做到平時揸車唔敢做嘅驚險動作，如勾車尾過車嘅刺激，當然受歡迎啦！
興仔在場內非常受歡迎，因為他可把一架時速20公里的Mini改到6、70公里，早在7、8歲已愛上砌模型的他坦言：「鍾意改車多過玩車，因為可以改摩打、電子變速器……好多嘢玩，特別係改細車要求仔細，好有挑戰性。」說得自信，全因他在Ive學機械維修，在車行做修車。
阿成未學過畫畫，但在網上展示自己製作的車殼後，即被車迷發掘，過去一年為過二百架車仔噴車殼，「喺車上畫花，一層層貼膠紙、𠝹花、噴油，5、6個鐘，收費大概百零蚊！唔叫做好搵，但每次見到自己作品喺場上互砌，有好大滿足感！今日幾十部車，有10架係我髹㗎！今年最Hit車殼係鮮色、撞色、螢光色、火紋車花。」
鄧先生賽車捧蛋，但兒子卻攞亞軍，「因唔想仔仔睇咁多電視，打咁多Gameboy，想訓練佢集中注意力，所以同佢一齊實現我兒時嘅夢想。佢本來冇興趣，但有獎攞就唔同啦！」
小貼士
Mini蒲點：粉嶺PYC車場、錦繡EGR車場、啟德KTR車場、觀塘Speedome
網頁：
下次1:24賽事
日期：2月16日
主辦：耀明體育會
地點：荃灣明愛中心禮堂
查詢：92357923