梁朝偉、楊千嬅與鄭中基主演的賀歲片《行運超人》前晚舉行首映，該片講述梁朝偉與鄭中基是堪輿高手，為楊千嬅鬥法。想不到《行運超人》現實版亦同時上映，堪輿學家蘇民峰為撐楊千嬅，公開鬧行家麥玲玲騙人。
梁朝偉、楊千嬅、鄭中基及蘇民峰等前晚到灣仔會展出席賀歲片《行運超人》首映禮。該片以堪輿術數為故事藍本，講述梁朝偉與鄭中基兩位堪輿高手為楊千嬅大鬥法，戲中偉仔的角色更參照著名堪輿學家蘇民峰而塑造，想不到現實中，蘇民峰與另一堪輿學家麥玲玲也為楊千嬅而鬥法。
蘇民峰前晚接受訪問大談藝人來年運程，提到楊千嬅屬牛於羊年犯太歲時，他表示千嬅運程會變好，只要搬屋、轉職或發生感情變化，便可化解。但早前另一堪輿學家麥玲玲曾公開為千嬅批算，表示她來年聲勢會下跌，蘇民峰聞言即力撐千嬅，並說：「佢（麥玲玲）呃人㗎，佢邊識睇㗎，睇相都有分級數，我屬鼠，本來今年沖太歲，又唔見我唔好。千嬅新一年應該唔會轉工，但如果搬屋或者感情有變化，應驗咗就會好，不過佢小心撞傷。冬天出世嘅人，呢幾年唔錯，係是非多啲，腸胃唔好，同怕交通意外。」
問到千嬅感情如何，蘇民峰說：「唔好講啦，總之有變化。」蘇民峰去年曾批鄭秀文今年會結婚，但結果她卻與許志安分手，蘇民峰解釋：「分手同結婚都係感情變化，唔係結就係分，佢○三年仍然有霧水姻緣。」
蘇民峰再談其他藝人，他表示梁朝偉○一年姻緣到，但他錯過了，再來的姻緣都不好。至於張栢芝及謝霆鋒，蘇民峰表示二人屬猴運程都不錯，有桃花運，霆鋒的官非亦會了結。
楊千嬅得悉蘇民峰的批算，她說：「OK準，我租約期滿想搬屋呀。感情變化就冇得咁樣睇嘅，隨緣啦，而且𠵱家搏殺期，要專心事業呀。事業要靠努力，唔關命理事，唔通話我富貴我就坐喺度唔使做咩？」
而堪輿學家麥玲玲對於蘇民峰的批評，她昨日接受訪問時說：「我真係同蘇師傅唔同級數，人哋拍戲㗎嘛，但我嘅focus（焦點）就淨係算命，而唔係拍戲。印象中嘅蘇師傅係充滿自信，並有『無敵哥哥』之稱，佢話自己算命係唔使睇書。」
麥玲玲又說：「其實師傅同客人算命係要睇好多方面，記憶猶新嘅係我同蘇師傅去年批謝霆鋒命相都完全相反，佢係話霆鋒去年三月會好，但我就話霆鋒立秋後先好轉，結果霆鋒運程係點大家都有目共睹。」麥玲玲表示有前晚《行》片的首映戲票，但她料到會有尷尬情況，所以最後選擇避席。
此外，千嬅將於下月三日（即年初三）生日，問她前男友鄭中基可會送禮？她說：「送到先知喎，不過我已經收到台灣唱片公司嘅禮物。」鄭中基被問到可會與千嬅慶祝，他卻笑說：「會送禮物，好彩你哋提我佢生日啫。」 採訪：比華利、魯萍攝影：陳偉權
