韋斯咸響禮拜日對阿仙奴踢得唔曳，就因為咁，包括我求大俠在內，有唔少人前日都睇好佢哋有機會響查爾頓身上搶分；但結果條豆腐防線累街坊，輸得好鬼肉酸。最激氣係領隊羅達賽後話好彩保頓同日都輸波喎，令佢哋護級重有前途；咁消極，唔使旨意我會再捧呢隊騎呢波！
睇前日韋斯咸瘋狂落飛，由受讓平?半變為平手，就知中伏嘅人應該為數唔少。我求大俠前日除咗睇曼聯對布力般直播外，亦有開電腦上網睇查爾頓對韋斯咸嗰場嘅文字直播。睇住韋斯咸後防屢犯錯誤就唔開胃。至於羅達擺明話要靠人哋失分至可以護級，隨時令球員更洩氣，如果羅達唔炒，睇怕韋斯咸……。
厄遜前日俾阿仙奴賣去伯明翰，呢個年輕人（沉咗幾年𠵱家都二十三歲）質素唔錯，響兵工廠浪費幾年真唔抵。佢走時好無奈：「無啦，我知再留響度都無前途。」佢走時啱啱係阿仙奴斟緊龍門馬高斯，全隊上下𠵱家都談論緊呢件巴西佬，反而無咩人提厄遜離隊嘅事，對比認真強烈。
前日由馬德里體育會對維爾瓦嘅西班牙盃，發生咗宗意外，馬體會前西班牙國腳後衞阿古利拿俾個波省中後，一度瞓響球場上昏迷不省，重冇埋呼吸㖭，令在場職球員同埋救護員嚇餐死，有人即刻同佢人工呼吸。好彩阿古利拿都幾硬淨，後嚟有番知覺，我諗佢唔係識龜息大法，就係同佢嘴對嘴嗰位救護員有料到。
講吓講吓，加斯居尼響中國已經「流浪」咗一段唔短嘅時間，𠵱家佢重響波導戰鬥隊試腳。早排我求大俠咪彈過佢喺大陸依然酒不離口嘅，最近無再聽見有類似消息，而且佢經理人重講明「肥仔嘜」會繼續操，直到波導滿意佢狀態為止。希望佢生性，呢段「無限期試腳」唔會太長嘞。