美股連跌5日，杜指跌到落8300水平，都咪話唔得人驚，但港股就紋風不動，噚日更反彈24點，收報9584。
外圍經濟及企業盈利都唔多理想，加埋美伊開戰如箭在弦，樣樣都利淡，想博技術反彈，其實都幾難，好友力撐至期指結算後，港股羊年隨時開個大黑盤，到時真係大吉利是。
比亞迪（1211）突然宣布用2.7億元人民幣收購西安一間小型汽車廠，消息導致股價急挫逾20%，收14.45元。管理層大驚之下，即急Call班芬佬開會解畫。不過，唔少芬佬認為，公司手頭資金超過12億元人民幣，相對而言，收購車廠代價只係一個小數目，但呢項收購確實無厘頭。
有芬佬話，投資比亞迪係因為睇中佢嘅電池業務，但公司無端端將啲錢用嚟買車廠，實在好難同班客交代。佢又抱怨投資民企最大嘅風險，就係公司隨時將資金進行意想不到嘅投資。此外，比亞迪解釋買車廠可配合汽車電池業務，更令人覺得荒謬之極。黑客話，民企突然投資於本業以外嘅業務，好大程度係反映管理層認為本業市場已飽和，增長幅度有限，芬佬重唔搏命沽貨咩！
東方燃氣（432）建議將股份40合1，股價隨即跌逾28.6%，低至1仙跌無可跌水平，其後有炒家入市收集，收1.3仙，跌幅收窄至7%。有人聲稱，今次併股純粹係幕後想壓價收貨，部署日後炒上，重有好多動作跟尾。不過，阿虎則估計併完股之後嘅最大動作，將係配股或供股，現時根本唔係上車時機，起碼要睇吓公司在國內嘅燃氣項目掂唔掂再算。
阿虎