港深兩地即將二十四小時通關，好多人都擔心港人湧去深圳買樓，拖冧新界樓市。但係美聯粉嶺帝庭軒分行經理胡建業對蘭西講，該公司近排見到，唔少手持中國護照嘅內地人士，查詢買香港樓，差唔多有兩成。佢哋詢問新界八百到一千方呎單位價錢，對屋苑盤興趣較大。部份重會問市區屋苑及近排廣告賣得多嘅新盤資料。
胡建業話，美記啱啱促成一單內地客入市。佢喺深圳已經有樓，因要港深兩邊走，貪方便，有個地方歇腳，好過租酒店，所以用百六萬買咗粉嶺御庭軒單位。
個客當初喺附近搭車，順便問吓香港個樓市點樣。睇咗御庭軒三次至落槌。原本諗住買一千呎，但冇銀行接受佢嘅按揭申請，要一次過畀晒錢，惟有買間細嘅。
胡建業透露，呢班內地客多數用本票或者禮券找數，首期就多數畀現金。聽講曾經有個客，真係成袋銀紙攞落嚟買樓。
為咗向貝沙灣住客提供一個本港前所未有嘅會所，電盈基建主席李智康嘅小宇宙相信已發揮到極限。噚日佢帶同記者親身體驗佢精心炮製嘅"DreamCarClub"同"YachtClub"。
"DreamCarClub"轎車隊包括勞斯萊斯、林寶堅尼、平治、積架同保時捷等，並提供五星級酒店水準嘅司機服務。"YachtClub"就係會所會起一個私人遊艇碼頭，重有一艘命名Bel-Air嘅遊艇。
蘭西收到一個負資產業主嘅傳真，抱怨政府話賣番啲私人參建居屋畀承建商，累到佢哋又跌番落谷底，一絲曙光都冇埋。
個業主指出，原本諗住孫九招可以穩定樓市，𠵱家將兩個私人參建居屋轉為私樓出售，加埋有四千幾個單位，變相增加供應，樓市必然再跌。
佢認為政府只係顧住減財赤，完全冇理呢班負資產業主嘅死活。最慘就係政策反覆，冇救樓市嘅決心。
恒隆尖沙嘴君臨天下幾時可以開賣？暫時唔可以咁早話畀大家知，但第一個買家，蘭西就可以率先披露，就係恒隆地產執行董事吳士元。
噚日吳士元同小記茶敍，大談公司未來賣樓方針，市場好關注佢哋公司嘅住宅君臨天下幾時可以賣、示範單位做好未？吳士元答吓答吓，就連自己會買君臨天下單位，都爆咗出嚟！
佢話會買三十八樓嘅單位，至於幾號室，就無可奉告。
點解揀三十八樓？不如等吳氏解畫。佢同小記講，曾經企係君臨天下二十八、三十八、四十八，同埋五十八樓視察，最後覺得企係三十八樓最舒服，所以決定揀呢層！
蘭西近日收唔少講全球寫字樓同舖位排名榜嘅新聞稿，焦點當然係香港嘅位置。但係蘭西發現，唔同測量行做嘅報告，香港寫字樓同舖位嘅排名都唔同。咁邊個至啱呢？
照計測量師行應該有個統一嘅標準計法，等大家可以統一口徑，唔係俾人問起，就真係唔知點答嘞。政府若引用數據，唔知會採用邊間測量行嘅調查結果呢？抑或政府有專人做呢？
農曆新年就快到，發展商都會搞活動邀請傳媒參加，藉以搞好關係。恒基尖沙嘴服務式住宅豪峰軒，大年初二會請記者睇煙花，由於樓盤高過前面嘅建築物，睇煙花肯定全無遮擋。
蘭西記得，恒基舊年曾經請記者喺呢個盤睇煙花。發展商咁做，可以突出樓盤嘅優點，記者又可以影到靚相交功課，真係一舉兩得。
蘭西
電郵地址：
