可能為響應政府推動「創意行業」，最近多咗人轉行做「創作人」，連利時商場嘅「撐爆Dee」就係其一。「撐爆Dee」做印刷出身，幾年前瘋狂愛上裏原宿，一放工就將布滿油墨嘅工衣換上猿人戰衣，到旺角及尖嘴「出巡」，挑戰其他「裏猿人」，十足十《8里公路》劇情。佢嘅出位之作，係將平面印刷技術擺落印Tee度，效果突出，引嚟迴響，喺利時商場佢啲「創作」Tee賣個滿堂紅，終於撈到第一桶金，亦踏上「創作人」之途。
喺香港做「創作人」，主要工作係喺報紙雜誌做訪問，做吓免費ModelShow吓品味。「撐爆Dee」成櫃裏原宿戰衣，打扮不成問題，佢唯一弱點就係鞋，着來着去都只係「科時溫」，重係行貨普通版，同上半身「豪華Crossover別注」衣着唔成正比。只好急急腳去買對別注波鞋「補身」，千揀萬揀下揀咗最新MT580別注，貪佢夠深色唔易污糟。不過對鞋唔平，「美國佬」開價$3,000，等如打工仔每月最低工資，「撐爆Dee」搵到唔少但「現金流」慢，只好四出籌募，甚至提出以貨換貨，不過遭拒絕。最後只好碌卡，重要卡駁卡！可知創作人背後真係有血有淚，為咗搞好形象着畀Fans睇搞到欠落一身卡數，所以千祈咪買翻版、要多啲支持，幫助創作人找清卡數為大前提。
主持人：大食Jack八卦熱報：