周三晚夜馬食白果，其後睇見美股繼續跌，心諗今鋪恒指Put輪9556可以搵番多少幫補，點知港股昨日走勢又係低開高收，恒指升24點，收9584。
港股過去兩日應跌未跌，明顯有買盤托住大市唔俾跌。趙飛雲分析原因，地產股受惠於政府計劃撤銷租管及資助公屋住戶改租私人樓。不過，除咗太古A（019）升3.1%外，其他地產股升幅普遍在1%以下，而太A大升據聞主要是公司回購所致，以上消息對港股幫助應該有限。
美股連跌5日技術超賣，周三晚美股收市後，德州儀器等科技股公布業績較市場預期佳，市場預期美股昨晚會有反彈，而昨日外圍美股期指亦已率先反映。不過，美股技術偏弱，前晚低位8306，跌近頭肩頂頸線8248，昨晚出現反彈十分正常，但後抽料受制於8500-8600阻力，反覆向下尋底機會大。
若外圍股市持續偏軟，港股將難以獨善其身，加上倉內恒指Put輪9556只是雞仔注，所以仍按原定計劃持有，恒指升穿9700才止蝕。
目前持有淡輪的最大風險是美伊開戰不成，例如侯賽因自動下台（可能性極低）；另外美國聯儲局本月28及29日議息，再大幅減息半厘（機會不大）刺激經濟，作為防範美伊戰事所帶來的經濟損害。
在現時的戰爭市炒輪，其實十分冒險，趙飛雲志在保持參與及作為磨練。事實上，倉內Put輪佔投資比重甚輕，並無太大壓力，等於冷馬買10元例飛考眼光。
趙飛雲