還記得上次睇煙花，那種震撼只有身在現場才能感受得到，所以即使明知年年維港兩岸人山人海，但偏仍有那麼多人去湊熱鬧，就算初二你諗住喺望到維港全景嘅高級餐廳訂位，收費亦會嚇人一驚，那種震撼分分鐘勁過煙花！
記者：陳冰麗
攝影：黃子偉
想平平哋又唔使同人迫，一樣有辦法！位於藝術中心六樓的雅廚絕對是一處欣賞煙花的好去處，即使身在室內也可透過玻璃睇到煙花，室外更是180度全開揚維港景色，全無障礙物阻隔。最重要是該店唯一一位女廚神李小姐，食物質素得以保證，怪不得年年這個時候都會爆場。
初二當晚這裏會供應自助餐，集意、美、法、日、印式美食，熱盤、冷盤合共逾五十款，另外還有專人即場即燒食品供應，收費也不過三百元，單是這個無敵靚景欣賞煙花，呢個價錢都算合理。我前日去過食飯，發覺除了即場燒烤吸引外，甜品亦唔可以錯過，德國芝士餅、英式蘋果金寶批、法式燉蛋、新口味意式橙班戟等，質素重拍得住大酒店水準，我就鍾意意式橙班戟，濕身食法有新意。
我當然亦唔會放過去偷師的機會，竄入廚房睇睇邊位靚仔廚師可以做出此拿手甜品，赫然發現負責主理甜品的原來是一位女廚神──李小姐。
她先後到過多間五星級酒店任行政總廚，現是雅廚唯一一位女性廚師兼是揸Fit人，她的強項除甜品外，就是一系列東南亞風味美食，如Laksa、OtakOtak香葉包魚等。傾談間覺得李小姐為人隨和、健談，但做事卻帶點執着，就好似要烹調地道星馬風味的Laksa，用料必定要用一種只有新加坡至有的Laksa葉才能煮到她心目中的味道。外人眼中可能會覺得她是一個固執的人，但其實她是對烹飪有份堅持及信念而已。有如此認真的大廚，加上面對無敵景致，初二睇煙花好去處重使諗？
與傳統班戟食法略有分別，班戟皮同樣以麵粉、奶、蛋等所製，但就會較薄，意式是濕身食法，配以由牛油、橙皮、橙汁、橙酒、糖等煮成的汁同食，口感更清新。
色澤好吸引的一個烤三文魚，烤雞試得多，印式烤三文魚塊重係首次試，大啖咬入口，外脆內軟，充滿香濃的芫荽及蒜的香味，實在難以抗拒！
雅廚
地址：灣仔港灣道2號香港藝術中心6樓
電話：28272923
營業時間：11:00am-10:00pm（星期五延至11:00pm，初三休息）