各報訪問新任大律師公會主席陳景生，內容最過癮嘅唔係佢講葉劉淑儀，而係佢嘅「紅色愛好」。報紙有一幅陳景生嘅辦公室大相，地氈係紅色，窗簾係金色帶微紅，陳主席着紅色上衣，結紅色呔，馬主H一睇，就想起陳主席隻馬「永豐泰」嘅綵衣，就係金色加紅色、衣袖就係紫色加金色，顏色非常鮮明。馬主H對呢隻馬印象深刻，皆因去年九月此馬在快活谷爆冷，俾馬主H捉個正着。
最抵死嘅就係曹仁超爆料，話陳道長愛穿紅色底褲。咁鍾意紅色，必有原因。紅色代表熱情、開朗、活潑。但陳主席研究風水二十年，痛罵填海破壞香港風水，「愈填愈衰」，必然知道紅色在五行之中嘅位置。
據八卦邱講，紅色在五行屬火，火生土，一啲屬於土命（凡戊、己日出世）之人，大體需要紅色為幸運色，又譬如有人愛穿黑色衣服，黑屬水，水生木，所以一啲木命人（甲、乙日出世），就鍾意着黑色。以此推論，陳主席豈非是「土命」？如果土命之人嘅八字，偏偏欠火，或火力不足，就更加愛上紅色咯。大家唔好以為陳主席畢業之後，平步青雲，紅色為佢帶來好運，就有樣學樣呀，呢啲事都係要請教高人，算過之後，先至可以決定。譬如袁天凡只打紅色呔，絕無其他，就係有大師指點嘅；《明報》老闆張曉卿淨係掛上綠色領呔，你估係貪得意咩。