近排除咗擺明車馬話會炒上嘅莊家股外，重有唔少無厘頭股仔炒上，其中因為賣盤傳聞異動嘅股仔亦唔少。
中洲控股（351）就係其中一隻，股價近兩日突然急升，噚日大升25%，收4.5仙。經紀陳話，唔清楚究竟係有人撩大股東賣盤，抑或大股東自己有心放盤？
經紀陳話，中洲大股東係河南省政府窗口公司，早於舊年年初已經話要將揸住嘅13.9%股權，賣畀獨立第三者，但商談咗接近1年後，竟然在舊年年底話搞唔成。
當時大股東賣盤價係6000萬元，以3.7億股計，賣價每股約0.16元。家陣中洲股價雖然升咗，但仍然低過當時賣價好多，或者就係呢個原因，隻股先至被炒上。
不過，由於大股東只係揸住十幾個巴仙咁大把，就算賣得出都唔會有全面收購，既然益唔到小股東及街外人，不如慳番啖氣好過。
慕容小初