唔知大家重記唔記得喺電視劇《西遊記貳》裏面飾演通臂猿猴嘅郭政鴻呢？呢隻冒牌齊天大聖，下個月十四號情人節就會同拍拖多年嘅女朋友李欣穎拉埋天窗，成為羊年娛樂圈第一件喜事！
噚日郭政鴻喺好朋友馬寶顓間羅浮宮婚紗影城度影結婚相，佢未來太太都幾靚女，唔講唔知，原來準郭太贏過廣州小姐冠軍㗎！佢今次名副其實係娶得美人歸。
馮仁昭讚郭政鴻揀情人節擺酒結婚有心思，佢竟然話係佢死黨歐陽震華同陶大宇嘅意思，郭政鴻話：「佢哋一個二個結晒婚，情人節嗰日唔知同老婆去邊度慶祝，知道我準備結婚擺酒，咪叫我揀情人節嗰日囉，等佢哋有地方去，唔使再諗節目喎。」歐陽震華同大宇戥朋友高興之餘又可以同老婆慶祝埋情人節，真係一舉兩得！
余文樂早前話過唔會送生日禮物畀緋聞女友鍾欣桐（阿嬌），但阿嬌就好似好想收佢份禮物，阿樂前晚去灣仔睇《行運超人》首映，佢話風頭火勢唔會送住，佢話：「我哋唔係建築喺一份禮物上，我都冇打畀佢祝賀，要拍戲開工嘛，心照啦。」阿樂知道阿嬌想收佢份禮物時好緊張話：「唔係嘛？問清楚佢先啦。」
周星馳噚晚西裝骨骨去灣仔出席活動，同教育局局長李國章、金管局總裁任志剛、名醫方心讓等，一齊做頒獎嘉賓，認真有地位，不過星仔就遲到十分鐘，匆匆入場，都唔得閒做訪問。而佢就負責頒獎畀文化界得獎人先濤數碼嘅朱家欣。
李連杰早前接受咗CNN《亞洲名人聊天室》訪問，講番冇後悔當年辭演《臥虎藏龍》，李連杰話辭演係因為佢對妻子利智嘅承諾，佢話：「我十年前答應過太太如果十年後仍然相戀就結婚，如果佢有BB，我就會唔做嘢等BB出世，所以我就唔拍戲一年。」
陳彥行同緋聞男友鄧兆尊噚日一齊接受新城電台節目《家天下》訪問，佢哋專登戴頂情侶冷帽出現，等各位記者手足有功課可交咁話。兆尊話農曆新年會同妹妹小艾食團年飯，不過妹夫釣魚郎就可免則免喇。至於行姐就會趁假期去台灣同泰國旅行。
肥姐沈殿霞因為喉嚨發炎出唔到聲，噚日冇去無綫下晝喺尖沙嘴舉行嘅記者會，連今晚喺演藝學院公演嘅《麗花皇宮》舞台劇，佢都冇法演出，要改喺二十九號舉行。噚日馮仁昭打電話問候肥姐，佢好辛苦先至講到：「多謝關心。」
