年近歲晚，唔少大公司都會請傳媒食團年飯，八方近排都食咗唔少，據相熟公關講，為令記者朋友有新鮮感，佢哋絞盡腦汁揀食肆。近排私房菜大行其道，上市公司「九龍建業」噚日就請記者去灣仔「食家菜」團年。呢間私房菜乃金庸二公子查傳倜（圖）開設，查大俠出名識食，個仔開嘅私房菜館，當然唔會失禮。查傳倜亦係食家，號稱「八袋弟子」，所謂八袋，裝嘅係柴、米、油、鹽、醬、醋、茶、酒，令查公子可嘗盡天下美食。
食色性也，菜單題為「細味人生情與慾」，頭盤有齊甜酸苦辣，名為「細味人生四冷盤」；至於主菜可謂集各家之大成，台式脆鱔、泰式辣蟹、上海炒年糕都有，但八方覺得最過癮都係啲菜名，一碟荷葉飯，冠以「荷花仙女米成炊」，簡直引人遐想。
傳真︰2623-9278
電郵︰