雖然大市始終唔見有突破，但好多細價股就炒過不亦樂乎，唔少大炒家紛紛重出江湖，魚缸真係好耐都冇試過咁熱鬧，有人肯做嘢始終好過股市靜英英。
好似當年由天下第一莊打理嘅毅興行（1047）已沉寂多年，但近日漸見鑊氣，起初小初重以為係第一莊手筆，但經紀陳話唔係，係佢嘅舊陣拍檔做嘢，據講家陣呢位拍檔嘅財力重好過第一莊。
毅興行噚日升6.9%，收0.92元，成交金額145萬元唔算多，但個棚就搭得異常熱鬧。隻股52周低位0.146元，累積升幅驚人，近期股價又屢創新高，但經紀陳話唔使驚，一來人哋重係成手貨；二來隻股PE只係7.2倍，股息率有7.6厘。現時流行炒工業股，毅興行有晒藉口炒作。
小初記得多年前炒毅興行賺過錢，但亦輸過大錢，提起呢隻股實在百感交集，要小初再去博一次，真係有多少猶疑。
慕容小初