由劉德華與梁朝偉主演的《無間道》叫好叫座，該片的前傳已在積極籌拍中，由扮演年輕版華仔和偉仔的陳冠希及余文樂擔正，未知是否怕日前爆粗互罵的二人再生衝突，余文樂和陳冠希在前傳中僅得兩場對手戲，其間連對白亦不用說。而新片中會加入吳鎮宇，扮演江湖大佬。
由梁朝偉、劉德華、余文樂、陳冠希、黃秋生及曾志偉等人主演，麥兆輝和劉偉強聯合導演的電影《無間道》，上月十二日公映至前日為止，約收了五千四百多萬，票房成績相當理想，寰亞電影公司早已公開表示會開拍《無間道前傳》，由余文樂和陳冠希飾演偉仔和華仔的角色。
余文樂和陳冠希這兩位主角日前曾爆粗互罵並幾乎大打出手，前傳由他們二人擔正，不知有關方面會否怕他們一起拍戲時再生摩擦？導演麥兆輝昨日接受電話訪問時說：「我唔擔心佢兩個會有任何摩擦，因為余文樂同陳冠希兩個喺成部戲入面，只有兩場戲係同場演出嘅，而呢兩場戲佢兩個都冇對白講。」
麥兆輝又透露前傳將不會有華仔和偉仔參演，且因黃秋生在《無》片中的演出大受好評，故在前傳中將加重其戲份。麥兆輝說：「秋生同志偉嘅戲份係會加番重啲，至於華仔同偉仔會唔會拍前傳，公司方面就想搵佢兩個客串，但我就覺得如果再加埋佢兩個入去，會令觀眾對啲角色好混淆，所以我都要再同公司傾吓。」
而劉德華與鄭秀文及梁朝偉與蕭亞軒在《無》中雖是戀人關係，但片中的感情戲份描述不多，麥兆輝昨日說：「喺前傳余文樂做嘅偉仔年輕版會同蕭亞軒係一對，而陳冠希做嘅華仔年輕版，就同趙頌茹一對，前傳嘅感情戲會加番多啲。好多人問我拍前傳有冇壓力，呢啲嘢我真係冇諗，𠵱家只係一心一意想搞好個劇本。」
麥兆輝又透露前傳中會加入一個新角色，由吳鎮宇飾演。據知鎮宇的角色表面上雖是黑幫揸弗人，乃余文樂的江湖大佬，實際卻是受命於黃秋生的警方卧底，但後來黃秋生發現鎮宇已不受控制，於是便利用曾志偉殺掉鎮宇，而志偉亦因而成功上位。
麥兆輝透露他在寫《無間道》的劇本時，本打算找鎮宇飾演秋生的黃Sir角色，最後因鎮宇辭演才由秋生頂上。麥兆輝說：「前傳我想再搵鎮宇做，但劇本未寫好，所以一切都未定實，部戲會喺四月開拍，公司想喺暑假第一檔上部戲，但我就唔會理映期，只會用心拍好部戲。」
對於在《無間道前傳》中與陳冠希僅得兩場對手戲，似刻意避免二人同場一事，余文樂昨日在電話中說：「我收到劇本之後，導演要我做乜我都會尊重導演安排，佢安排我哋同唔同場，我都一樣照做，做演員要有操守嘅。」
此外，杜汶澤憑《無間道》中「儍強」一角而大受好評，演技受到認同，昨日杜汶澤接受電話訪問時，表示麥兆輝曾約他商談開拍《無間道前傳》時，該找誰飾演儍強年輕版，杜汶澤說：「做儍強呢個角色，太靚仔又唔得，靚仔過我反而有心水呀，我覺得天佑（Shine成員徐天佑）幾好，佢性格幾似細個時嘅我，但個樣相距太遠！」
採訪：陳月媚、張止寒
